17 sáýirde Qatar Ámiri sheıh Tamım bın Hamad ál-Tanı Máskeýge resmı saparmen keldi, dep habarlaıdy "Adyrna" ulttyq portaly.
Sapar aıasynda Qatar basshysy Reseı prezıdenti Vladımır Pýtınmen Ýkraınadaǵy soǵys, Taıaý Shyǵystaǵy turaqsyzdyq jáne energetıka salasyndaǵy yntymaqtastyq máselelerin talqylaıdy.
Kreml bul saparǵa erekshe mán berip otyr. Reseı prezıdentiniń baspasóz hatshysy Dmıtrıı Peskovtyń aıtýynsha, eki el basshylary "birqatar kúrdeli halyqaralyq jáne ekijaqty máseleler boıynsha salmaqty ári mazmundy áńgime ótkizedi". Sondaı-aq birneshe mańyzdy kelisimderge qol qoıylady dep kútilýde.
Qatar buǵan deıin Reseı men Ýkraına arasyndaǵy shıelenisti dıplomatııalyq jolmen sheshýge talpynyp, ásirese soǵys saldarynan ajyrap qalǵan balalardy qaıtarý boıynsha deldaldyq ról atqarǵan. Bul joly da Qatar tarapy qaqtyǵysty toqtatý maqsatynda beıbit kelissózderdi alǵa jyljytýǵa múddeli ekenin bildirip otyr.
Qatar syrtqy ister mınıstri Muhammed ál-Hýlaıfı TASS agenttigine bergen suhbatynda kezdesýde Ýkraınadan bólek Sırııa men Gaza sektory máseleleri de qaralatynyn málimdedi. Sonymen qatar, energetıka salasyndaǵy yntymaqtastyq, onyń ishinde suıytylǵan tabıǵı gaz (SPG) saýdasy men ınfraqurylymy boıynsha birlesken jobalar talqylanady.
Aıta ketý kerek, bul kezdesý álemdik geosaıası shıelenis aıasynda ótip jatyr. AQSh burynǵy prezıdenti Donald Tramp ta Ýkraınadaǵy qantógisti toqtatýǵa qatysty óz josparyn birneshe ret usynǵanymen, naqty nátıjege qol jetkize alǵan joq. Máskeý jaǵy bul máseleni sheshý ońaı bolmaıtynyn jáne áskerı-saıası sheshimder uzaq ýaqytty talap etetinin aıtyp keledi.
