شىمكەنت قالاسىندا تاريحي-مادەني كەشەن "شىمقالا" قاراۋسىز قالىپ، توزىپ بارادى. بۇل نىسان نەبارى ءتورت جىل بۇرىن سالتاناتتى تۇردە اشىلىپ، ونىڭ قۇرىلىسىنا مەملەكەتتەن شامامەن 3 ميلليارد تەڭگە بولىنگەن بولاتىن. الايدا قازىرگى جاعدايى تۋريستەر مەن قالا تۇرعىندارىنىڭ كوڭىلىن قىنجىلتىپ وتىر، دەپ حابارلايدى "ادىرنا" ۇلتتىق پورتالى كتك ارناسىنا سىلتەمە جاساپ حابارلادى.
كەشەن اتاۋىنىڭ ءوزى – "شىمقالا" – كونە قالا ورنىنا سالىنعانىن مەڭزەيدى. ارحەولوگتار بۇل جەردە ەجەلگى قۇرىلىس قالدىقتارىن تاپقان. الايدا زاماناۋي قۇرىلىس ساپاسى كوڭىل كونشىتپەيدى. قابىرعالاردان پليتكالار ءتۇسىپ، اللەيالار ارامشوپكە تولىپ كەتكەن، ال سىرتىنا جاعىلعان ساندىك قاباتتار كەتىلىپ، كەشەن جۇدەۋ كۇيگە تۇسكەن.
كەشەنگە كەلۋشىلەردەن 1000 تەڭگە كولەمىندە كىرۋ اقىسى الىنادى. بىراق ول قارجى دا ينفراقۇرىلىمدى قالپىنا كەلتىرۋگە باعىتتالماي وتىر. قازىرگى تاڭدا ەتنواۋىل تولىق جابىلىپ، بۇرىنعى يۋرتالار مەن اعاش اتكەنشەكتەر شەتكە جيناپ تاستالعان كۇيدە شاڭ باسىپ جاتىر.
كەشەن ديرەكتورى جاندوس قۇرباننىڭ ايتۋىنشا، باستى ماسەلە — قۇجاتتاردىڭ جوقتىعىندا.
"كەشەننىڭ جالپى اۋدانى 4,5 گەكتاردى قۇرايدى. بىراق بىزدە تەك جەرگە قاتىستى مەملەكەتتىك اكت قانا بار. قابىلداۋ اكتىسى جاسالماعان بولۋى مۇمكىن، سوندىقتان جاڭا سالىنعان جانە قايتا قالپىنا كەلتىرىلگەن نىسانداردىڭ ەشقايسىسىندا قۇجات جوق", — دەدى ول.
اكىمدىك وكىلدەرى بيىل كەشەنگە قاتىستى قۇجاتتاردى رەتكە كەلتىرۋدى جوسپارلاپ وتىرعاندارىن مالىمدەدى. الايدا قۇجاتتارسىز كۇردەلى جوندەۋ جۇمىستارىن باستاۋ مۇمكىن ەمەس ەكەنىن العا تارتتى.
ايتا كەتەيىك، بۇل جاعداي جالعىز ەمەس. بۇعان دەيىن تۇركىستان وبلىسىنداعى تاريحي نىسان — اقبيكەش مۇناراسى دا رەستاۆراتسيادان كەيىن قۇلاپ تۇسكەن بولاتىن.
