Shymkent qalasynda tarıhı-mádenı keshen "Shymqala" qaraýsyz qalyp, tozyp barady. Bul nysan nebári tórt jyl buryn saltanatty túrde ashylyp, onyń qurylysyna memleketten shamamen 3 mıllıard teńge bólingen bolatyn. Alaıda qazirgi jaǵdaıy týrıster men qala turǵyndarynyń kóńilin qynjyltyp otyr, dep habarlaıdy "Adyrna" ulttyq portaly KTK arnasyna silteme jasap habarlady.
Keshen ataýynyń ózi – "Shymqala" – kóne qala ornyna salynǵanyn meńzeıdi. Arheologtar bul jerde ejelgi qurylys qaldyqtaryn tapqan. Alaıda zamanaýı qurylys sapasy kóńil kónshitpeıdi. Qabyrǵalardan plıtkalar túsip, alleıalar aramshópke tolyp ketken, al syrtyna jaǵylǵan sándik qabattar ketilip, keshen júdeý kúıge túsken.
Keshenge kelýshilerden 1000 teńge kóleminde kirý aqysy alynady. Biraq ol qarjy da ınfraqurylymdy qalpyna keltirýge baǵyttalmaı otyr. Qazirgi tańda etnoaýyl tolyq jabylyp, burynǵy ıýrtalar men aǵash átkenshekter shetke jınap tastalǵan kúıde shań basyp jatyr.
Keshen dırektory Jandos Qurbannyń aıtýynsha, basty másele — qujattardyń joqtyǵynda.
"Keshenniń jalpy aýdany 4,5 gektardy quraıdy. Biraq bizde tek jerge qatysty memlekettik akt qana bar. Qabyldaý aktisi jasalmaǵan bolýy múmkin, sondyqtan jańa salynǵan jáne qaıta qalpyna keltirilgen nysandardyń eshqaısysynda qujat joq", — dedi ol.
Ákimdik ókilderi bıyl keshenge qatysty qujattardy retke keltirýdi josparlap otyrǵandaryn málimdedi. Alaıda qujattarsyz kúrdeli jóndeý jumystaryn bastaý múmkin emes ekenin alǵa tartty.
Aıta keteıik, bul jaǵdaı jalǵyz emes. Buǵan deıin Túrkistan oblysyndaǵy tarıhı nysan — Aqbıkesh munarasy da restavraııadan keıin qulap túsken bolatyn.
