اباي وبلىسىنىڭ اياگوز اۋدانىندا ءۇش ادام اعاش اسپالى كوپىر ارقىلى موتوتسيكل وتكىزبەك بولعاندا وزەنگە قۇلاپ كەتكەن. قۇتقارۋشىلار ەكى ەر ادامنىڭ دەنەسىن تاپتى، ءۇشىنشى ادامدى ىزدەۋ جۇمىستارى جالعاسىپ جاتىر، دەپ حابارلايدى "ادىرنا" ۇلتتىق پورتالى.
وقيعا 15 ساۋىردە بولعان. وبلىستىق توتەنشە جاعدايلار دەپارتامەنتىنىڭ مالىمەتىنشە، اياكوز قالاسىنداعى «101» قۇتقارۋ قىزمەتىنە اقشاۋلى اۋىلىندا توتەنشە جاعداي ورىن العانى تۋرالى حابار تۇسكەن.
"كۋاگەرلەردىڭ ايتۋىنشا، ءۇش جۇمىسشى كوكقامىر ۋچاسكەسىندە ورنالاسقان اعاش اسپالى كوپىر ارقىلى موتوتسيكلدى وتكىزبەك بولعان. الايدا ولار كوپىردەن وزەنگە – قاراكولگە قۇلاپ كەتكەن. وقيعا ورنىندا ولاردىڭ ۇيالى تەلەفوندارى مەن سىرت كيىمدەرى تابىلعان،" – دەلىنگەن اباي وبلىسى تجد حابارلاماسىندا.
الەۋمەتتىك جەلىلەردە تاراعان ۆيدەودان كوپىردىڭ اپاتتى جاعدايدا ەكەنى، ادام جۇرۋگە مۇلدەم جارامسىز ەكەنى بايقالادى.
16 ساۋىردە قۇتقارۋشىلار مەن جەرگىلىكتى بيلىك وكىلدەرى ەكى ەر ادامنىڭ دەنەسىن تاپقان. كەيىنىرەك، ءۇشىنشى ادامنىڭ – 1967 جىلى تۋعان ەر ادامنىڭ دەنەسى وقيعا ورنىنان ەكى شاقىرىم جەردەن تابىلدى.
مارقۇمداردىڭ بارلىعى – جەرگىلىكتى شارۋا قوجالىعىنىڭ جۇمىسشىلارى. قۇتقارۋ جانە ىزدەستىرۋ جۇمىستارىنا تجد قىزمەتكەرلەرى، جەرگىلىكتى اكىمدىك وكىلدەرى، ەرىكتىلەر جانە ارنايى تەحنيكا جۇمىلدىرىلدى.
باسقا ماتەريالدار
Adyrna.kz ۇلتتىق پورتالىنىڭ ماڭىزدى اقپاراتتارىنا جازىلۋ
سوڭعى جاڭالىقتار تۋرالى حاباردار بولىڭىز