قازاقستاندا ساموكات پەن ۆەلوسيپەد جۇرگىزۋشىلەرىنە قاتىستى زاڭدى قاتاڭداتۋ جوسپارلانىپ وتىر. بۇل تۋرالى ىشكى ىستەر ءمينيسترىنىڭ ورىنباسارى سانجار ءادىلوۆ ماجىلىستە وتكەن بريفينگتە مالىمدەدى، دەپ حابارلايدى "ادىرنا" ۇلتتىق پورتالى.
تۇرعىندار ساموكات مىنۋشىلەر تروتۋارمەن ءجۇرىپ، جىلدامدىقتى ساقتامايتىنىن ايتىپ، نارازىلىق بىلدىرۋدە. سونىمەن قاتار، نومىرلىك بەلگىلەردىڭ بولماۋىنا بايلانىستى ولاردى جاۋاپكەرشىلىككە تارتۋ قيىنعا سوعاتىنى ايتىلدى.
سانجار ءادىلوۆ بۇل ماسەلە بويىنشا جۇمىستار جالعاسىپ جاتقانىن جەتكىزدى.
"ادىلەت مينيسترلىگى جانىنداعى ۆەدومستۆوارالىق جۇمىس توبىنىڭ الاڭىندا بىرقاتار قوسىمشا تۇزەتۋلەردى دايىنداپ جاتىرمىز. ونىڭ ىشىندە شەتەلدىك تاجىريبەنى ەنگىزۋ تۋرالى ۇسىنىس تا بار. ءبىز شۆەيتساريا تاجىريبەسىن زەرتتەدىك. ول جاقتا تەك ساموكاتتارعا عانا ەمەس، ۆەلوسيپەدتەرگە دە مەملەكەتتىك نومىرلەر بەرىلەدى. سوندىقتان بۇل نورما مەن ۇسىنىس وتە وزەكتى دەپ ەسەپتەلەدى. قازىر ءبىز بۇل باعىتتا بەلسەندى جۇمىس ىستەپ جاتىرمىز", – دەدى ول.
