Qazaqstanda samokat pen velosıped júrgizýshilerine qatysty zańdy qatańdatý josparlanyp otyr. Bul týraly ishki ister mınıstriniń orynbasary Sanjar Ádilov Májiliste ótken brıfıngte málimdedi, dep habarlaıdy "Adyrna" ulttyq portaly.
Turǵyndar samokat minýshiler trotýarmen júrip, jyldamdyqty saqtamaıtynyn aıtyp, narazylyq bildirýde. Sonymen qatar, nómirlik belgilerdiń bolmaýyna baılanysty olardy jaýapkershilikke tartý qıynǵa soǵatyny aıtyldy.
Sanjar Ádilov bul másele boıynsha jumystar jalǵasyp jatqanyn jetkizdi.
"Ádilet mınıstrligi janyndaǵy vedomstvoaralyq jumys tobynyń alańynda birqatar qosymsha túzetýlerdi daıyndap jatyrmyz. Onyń ishinde sheteldik tájirıbeni engizý týraly usynys ta bar. Biz Shveıarııa tájirıbesin zerttedik. Ol jaqta tek samokattarǵa ǵana emes, velosıpedterge de memlekettik nómirler beriledi. Sondyqtan bul norma men usynys óte ózekti dep esepteledi. Qazir biz bul baǵytta belsendi jumys istep jatyrmyz", – dedi ol.
