استانادا ءوتىپ جاتقان II ورتالىق ازيا مەديافورۋمىندا مادەنيەت جانە اقپارات ءمينيسترى ايدا بالاەۆا ورتالىق ازيا ەلدەرىنىڭ بىرلەسكەن تەلەارنا مەن وڭىرلىك مەدياپلاتفورما قۇرۋ مۇمكىندىگىن قاراستىرىپ جاتقانىن مالىمدەدى، دەپ حابارلايدى "ادىرنا" ۇلتتىق پورتالى.
ءمينيستردىڭ ايتۋىنشا، بۇل باستاما مەملەكەت باسشىلارى دەڭگەيىندە بىرنەشە رەت كوتەرىلگەن. بىلتىر استانادا وتكەن كونسۋلتاتيۆتىك كەزدەسۋدە پرەزيدەنت قاسىم-جومارت توقاەۆ وڭىرلىك مەدياونىمدەر جاساۋ تۋرالى ۇسىنىس بىلدىرگەن. بۇل ۇسىنىس قازىرگى تاڭدا ناقتى جوبالارعا ۇلاسىپ، ىسكە اسۋ مۇمكىندىگى قاراستىرىلىپ وتىر.
ايدا بالاەۆا فورۋمنىڭ ايماق ەلدەرى ءۇشىن اقپاراتتىق ىنتىماقتاستىقتى دامىتۋعا ارنالعان بىرەگەي الاڭ ەكەنىن اتاپ ءوتتى. ونىڭ ايتۋىنشا، بىرلەسكەن تەلەارنا ارقىلى ورتالىق ازيا حالىقتارىنىڭ دوستىعى مەن بىرلىگىن ناسيحاتتايتىن، سونداي-اق ءوڭىردىڭ تاريحى مەن مادەنيەتىن تانىتاتىن تانىمدىق باعدارلامالار ۇسىنىلادى.
مينيستر سونىمەن قاتار، گۋمانيتارلىق سالاداعى بايلانىستاردىڭ دا جاڭا دەڭگەيگە كوتەرىلگەنىن ايتتى. بۇگىندە بىرقاتار ورتاق جوبالار جۇزەگە اسىرىلىپ جاتىر. اتاپ ايتقاندا، استانادا Euronews ارناسىنىڭ ورتالىق ازيا بويىنشا وكىلدىگى اشىلدى، مادەنيەت كۇندەرى وتكىزىلىپ، كرەاتيۆتى يندۋستريانى دامىتۋ باعىتىندا جۇمىس ءجۇرىپ جاتىر.
ورتالىق ازيا جۋرناليستيكا اكادەمياسىن قۇرۋ، وڭىرلىك جۋرناليستيكا سىيلىعىن تاعايىنداۋ، جاڭا تەلەجوبالاردى ىسكە اسىرۋ جانە ايماقتىق كونتەنتتى حالىقارالىق مەدياپلاتفورمالاردا ىلگەرىلەتۋ – بولاشاقتاعى جوسپارلار قاتارىندا.
