Astanada ótip jatqan II Ortalyq Azııa medıaforýmynda Mádenıet jáne aqparat mınıstri Aıda Balaeva Ortalyq Azııa elderiniń birlesken telearna men óńirlik medıaplatforma qurý múmkindigin qarastyryp jatqanyn málimdedi, dep habarlaıdy "Adyrna" ulttyq portaly.
Mınıstrdiń aıtýynsha, bul bastama memleket basshylary deńgeıinde birneshe ret kóterilgen. Byltyr Astanada ótken Konsýltatıvtik kezdesýde Prezıdent Qasym-Jomart Toqaev óńirlik medıaónimder jasaý týraly usynys bildirgen. Bul usynys qazirgi tańda naqty jobalarǵa ulasyp, iske asý múmkindigi qarastyrylyp otyr.
Aıda Balaeva forýmnyń aımaq elderi úshin aqparattyq yntymaqtastyqty damytýǵa arnalǵan biregeı alań ekenin atap ótti. Onyń aıtýynsha, birlesken telearna arqyly Ortalyq Azııa halyqtarynyń dostyǵy men birligin nasıhattaıtyn, sondaı-aq óńirdiń tarıhy men mádenıetin tanytatyn tanymdyq baǵdarlamalar usynylady.
Mınıstr sonymen qatar, gýmanıtarlyq saladaǵy baılanystardyń da jańa deńgeıge kóterilgenin aıtty. Búginde birqatar ortaq jobalar júzege asyrylyp jatyr. Atap aıtqanda, Astanada Euronews arnasynyń Ortalyq Azııa boıynsha ókildigi ashyldy, mádenıet kúnderi ótkizilip, kreatıvti ındýstrııany damytý baǵytynda jumys júrip jatyr.
Ortalyq Azııa jýrnalıstıka akademııasyn qurý, óńirlik jýrnalıstıka syılyǵyn taǵaıyndaý, jańa telejobalardy iske asyrý jáne aımaqtyq kontentti halyqaralyq medıaplatformalarda ilgeriletý – bolashaqtaǵy josparlar qatarynda.
