Astanada ötıp jatqan II Ortalyq Aziia mediaforumynda Mädeniet jäne aqparat ministrı Aida Balaeva Ortalyq Aziia elderınıŋ bırlesken telearna men öŋırlık mediaplatforma qūru mümkındıgın qarastyryp jatqanyn mälımdedı, dep habarlaidy "Adyrna" ūlttyq portaly.
Ministrdıŋ aituynşa, būl bastama memleket basşylary deŋgeiınde bırneşe ret köterılgen. Byltyr Astanada ötken Konsultativtık kezdesude Prezident Qasym-Jomart Toqaev öŋırlık mediaönımder jasau turaly ūsynys bıldırgen. Būl ūsynys qazırgı taŋda naqty jobalarǧa ūlasyp, ıske asu mümkındıgı qarastyrylyp otyr.
Aida Balaeva forumnyŋ aimaq elderı üşın aqparattyq yntymaqtastyqty damytuǧa arnalǧan bıregei alaŋ ekenın atap öttı. Onyŋ aituynşa, bırlesken telearna arqyly Ortalyq Aziia halyqtarynyŋ dostyǧy men bırlıgın nasihattaityn, sondai-aq öŋırdıŋ tarihy men mädenietın tanytatyn tanymdyq baǧdarlamalar ūsynylady.
Ministr sonymen qatar, gumanitarlyq saladaǧy bailanystardyŋ da jaŋa deŋgeige köterılgenın aitty. Bügınde bırqatar ortaq jobalar jüzege asyrylyp jatyr. Atap aitqanda, Astanada Euronews arnasynyŋ Ortalyq Aziia boiynşa ökıldıgı aşyldy, mädeniet künderı ötkızılıp, kreativtı industriiany damytu baǧytynda jūmys jürıp jatyr.
Ortalyq Aziia jurnalistika akademiiasyn qūru, öŋırlık jurnalistika syilyǧyn taǧaiyndau, jaŋa telejobalardy ıske asyru jäne aimaqtyq kontenttı halyqaralyq mediaplatformalarda ılgerıletu – bolaşaqtaǧy josparlar qatarynda.
