بۇگىن ەلىمىزدە «كۇش لەكتسياسى» جالپىرەسپۋبليكالىق جوباسى باستالدى. ونىڭ العاشقى اپروباتسياسى تۇركىستان وبلىسىندا وتۋدە. اتاپ ايتقاندا، تۇركىستان قالاسىنداعى Farab كىتاپحاناسىندا قوعام مەن جاستارعا ارنالعان تىڭ فورماتتاعى «كۇش لەكتسياسى» سىننان ءوتتى.
جوبانىڭ اۆتورى ءارى جەتەكشىسى – ۇلتتىق سپورت تۇرلەرى مەن كۇش مادەنيەتىن زەرتتەۋشى، «Baluan tas» قۇرىلىمىنىڭ نەگىزىن قالاۋشى ابىلايحان قالنازاروۆ.
«كۇش لەكتسياسى» – جاستاردىڭ رۋحىن كوتەرىپ، ومىرلىك ۇستانىمىن نىعايتۋعا، ۇلتتىق بولمىس پەن باتىرلىق قۇندىلىقتاردى دارىپتەۋگە باعىتتالعان جاڭا موتيۆاتسيالىق پلاتفورما. جوبا ازاماتتىق باستاما رەتىندە جۇزەگە اسىپ وتىر جانە قازاقستاننىڭ 20 ءوڭىرىن قامتۋدى كوزدەيدى. ول «Baluan tas» ۇلتتىق سپورت تۇرلەرى جانە مادەنيەتى اكادەمياسىنىڭ ىسكە قوسىپ وتىرعان ەكىنشى جوباسى.
«بۇل – قوعامعا، اسىرەسە تالاپتى ءارى سپورتپەن شۇعىلداناتىن جاستارعا ارنالعان بۇرىن-سوڭدى بولماعان ەرەكشە جوبا. باستى ماقساتىمىز – قازاق تاريحىنداعى مەملەكەتشىل تۇلعالار مەن باتىر-بالۋانداردىڭ تاعىلىمدى ءومىر جولىن بۇگىنگى ۇرپاققا ۇلگى ەتۋ. بۇل – شىنايى ەرلىك پەن ەڭبەكتىڭ، ۇلتتىق رۋح پەن تاباندىلىقتىڭ ءدارىسى»، – دەدى ابىلايحان قالنازاروۆ.
جوبانىڭ نەگىزگى مىندەتتەرى:
- ۇلتتىق باتىرلىق پەن كۇش مادەنيەتىن جاڭعىرتۋ;
- جاستارعا شىنايى موتيۆاتسيا بەرۋ;
- سپورتشى بۋىنعا باعىتتالعان ارنايى دارىستەر وتكىزۋ;
- ۇلتتىق قۇندىلىقتاردى قازىرگى زامانمەن ساباقتاستىرۋ;
- اشىق ديالوگ الاڭىن قالىپتاستىرۋ;
- تسيفرلىق جانە مەديا-كونتەنت جاساۋ ارقىلى كەڭ اۋديتوريانى قامتۋ.
العاشقى ناتيجەلەر مەن الداعى جوسپارلار:
جوبا اياسىندا 2025 جىلدىڭ سوڭىنا دەيىن:
◉ 20 وڭىردە موتيۆاتسيالىق لەكتسيالار ۇيىمداستىرىلادى;
◉ 300 مىڭنان استام جاس قاتىساتىن بولادى;
◉ 100-دەن استام تانىمال تۇلعا سپيكەر رەتىندە شاقىرىلادى;
◉ الەۋمەتتىك جەلىلەر مەن مەديا ارقىلى ميلليونعا جۋىق اۋديتوريانى قامتيتىن كونتەنت ۇسىنىلادى.
سونىمەن قاتار جوبانىڭ ىسكە اسۋىنا العاش قولداۋ ءبىلدىرىپ وتىرعان Farab كىتاپحاناسىمەن ءوزارا ىنتىماقتاستىق تۋرالى مەموراندۋمعا قول قويىلدى. بۇل ارىپتەستىك الداعى ۋاقىتتا مادەني-اعارتۋشىلىق باعىتتاعى جاڭا جوبالارمەن جالعاسىن تاپپاق. تاعى ءبىر ماڭىزدى تۇس، «Baluan tas» قۇرىلىمى رەسپۋبليكالىق دەڭگەيدە ارەكەت ەتەتىن ۇيىم بولعاندىقتان، ونىڭ تۇركىستان قالاسى فيليالى جەتەكشىلىگىنە جەرگىلىكتى عالىم، PhD دوكتور قاينار قالدىباي بەكىتىلدى.
ايتا كەتەيىك، «Baluan tas» ۇلتتىق سپورت تۇرلەرى جانە مادەنيەتى اكادەمياسى – قازاق حالقىنىڭ بارلىق ءداستۇرلى سپورتىن ساقتاۋ، دامىتۋ جانە حالىقارالىق دەڭگەيدە تانىمال ەتۋگە باعىتتالعان يننوۆاتسيالىق ورتالىق. بۇل ۇيىم ۇلتتىق سپورت تۇرلەرىنىڭ فيزيكالىق، رۋحاني-مادەني جانە زياتكەرلىك قۇندىلىقتارىن زەرتتەپ زەردەلەپ، بولاشاق ۇرپاققا جەتكىزۋدى جانە سپورت ارقىلى ەلدىك رۋحتى كۇشەيتۋدى كوزدەيدى. ول 2025 جىلى 17 ناۋرىزىندا ۇلتتىق سپورت تۇرلەرى زەرتتەۋشىلەرى مەن عالىمدارىنىڭ باستاماسىمەن استانا قالاسىندا قۇرىلىپ، ءوز جۇمىسىن باستادى. قۇرىلتايشىسى جانە جەتەكشىسى ابىلايحان قالنازاروۆ.
