شىمكەنتتىك پوليتسەيلەر الەۋمەتتىك جەلىگە مونيتورينگ جۇرگىزۋ بارىسىندا بىرقاتار وعاش ارەكەتتەردى انىقتادى. ونىڭ اراسىندا بەلگىسىز ادامنىڭ قالا كوشەلەرىنىڭ بىرىندە Opel Astra اۆتوكولىگىنە يت بايلاپ، ونى سۇيرەپ بارا جاتقانى تاسپالانعان بەينەجازبا بار. كولىگىمەن "يت جەتەكتەگەن" جۇرگىزۋشىگە حاتتاما تولتىرىلدى، دەپ حابارلايدى "ادىرنا" ۇلتتىق پورتالى.
الەۋمەتتىك جەلىدەگى ۆيدەولاردى سۇزگىدەن وتكىزۋ بارىسىندا پوليتسيا قىزمەتكەرلەرى ەرەكشە ادىسپەن "يت جەتەكتەگەن" جۇرگىزۋشىنى انىقتادى.
«جەدەل باسقارۋ ورتالىعىنىڭ ينسپەكتورلارى «قورعاۋ» قوسىمشاسىنىڭ كومەگىمەن كولىكتىڭ قوزعالعان ورنى مەن جۇرگىزۋشىنىڭ جەكە باسىن انىقتادى. ول تۇركىستان وبلىسىنىڭ تۇرعىنى بولىپ شىقتى. دەرەكتەر ءال-فارابي اۋداندىق پب-عا جولداندى»، - دەپ جازدى ءىىم-نەن.
كولىگىمەن يت سۇيرەگەن ادامنىڭ سوزىنشە، ول كوشىپ جاتقان. اۆتوكولىكتىڭ سالونىندا يتكە ورىن بولماعاندىقتان، ونى كولىككە بايلاۋدى ۇيعارعان.
جۇرگىزۋشىگە قاتىستى اقبتك-ءنىڭ 407-2-بابى بويىنشا اكىمشىلىك حاتتاما تولتىرىلدى. جينالعان ماتەريالدار مامانداندىرىلعان اكىمشىلىك سوتقا جىبەرىلەدى.
ەر اداممەن پروفيلاكتيكالىق تۇسىندىرمە جۇمىستارى جۇرگىزىلدى.
"ادىرنا" ۇلتتىق پورتالى
