قازاق اۆتورلىق قوعامى 400-دەن استام ءانشى مەن اۆتور ءوز قالاماقىسىن ءالى الماعانىن مالىمدەدى، دەپ حابارلايدى “ادىرنا” ۇلتتىق پورتالى.
«قازاقستان اۆتورلىق قوعامىنىڭ» (KazAK) باس ديرەكتورى اينۇر ەسەندىكوۆانىڭ ايتۋىنشا، 400-دەن استام كومپوزيتور مەن ورىنداۋشى، ونىڭ ىشىندە تانىمال جۇلدىزدار دا بار، ءالى كۇنگە . دەيىن ءوز تۋىندىلارى ءۇشىن قالاماقى الا الماي ءجۇر. بۇعان نەگىزگى سەبەپ – اۆتورلارمەن بايلانىس ورناتۋدىڭ قيىندىعى.
“اۆتورلىق جانە ساباقتاس قۇقىقتار تۋرالى زاڭعا سايكەس، ءبىز اۆتورلار مەن قۇقىق يەلەرىن ءوز بەتىمىزشە ىزدەۋگە مىندەتتىمىز. وسىعان وراي، ءبىزدىڭ سايتتا ارنايى رەسمي ءتىزىم جاريالانعان. بۇل – زاڭنىڭ تالابى”، – دەدى ەسەندىكوۆا بريفينگتە.
ونىڭ ايتۋىنشا، قوعام قىزمەتكەرلەرى اۆتورلارمەن بايلانىس ورناتۋ ءۇشىن بارلىق مۇمكىندىكتى پايدالانىپ جاتىر: مەسسەندجەرلەر، Instagram, Telegram, WhatsApp ارقىلى حابارلاسادى، تەلەفون شالادى. بىراق جاۋاپ الۋ ءاردايىم مۇمكىن ەمەس.
“كەيبىر انشىلەر بايلانىسقا شىعادى. بىراق كوبىنىڭ اتىنان سويلەيتىن مەنەدجەرلەرى مەن پروديۋسەرلەرى بار، ولار كەيدە ءبىزدى الاياقتار دەپ ويلاپ، جاۋاپ بەرمەيدى. بۇل جالپى ۇدەرىستى تەجەيدى”، – دەيدى ەسەندىكوۆا.
وسى رەتتە ول بارلىق قۇقىق يەلەرىنە ۇندەۋ جاسادى:
“ەگەر بىزدەن حابارلاما كەلسە – مىندەتتى تۇردە جاۋاپ بەرىڭىزدەر. ءبىز سىزدەردىڭ اقشالارىڭىزدى قايتارعىمىز كەلەدى. بۇل – ءسىزدىڭ زاڭدى تابىسىڭىز”، – دەپ تۇيىندەدى ول.
KazAK “ىزدەۋدەگى” ارتىستەردىڭ ءتىزىمىن جاريالادى. تىزىمدە بايلانىس مالىمەتتەرى اشىق تۇردە قولجەتىمدى ونەرپازداردىڭ دا بولۋى. 2024 جىلى جاريالانعان بۇل تىزىمدە ديماش قۇدايبەرگەن، ءالى وقاپوۆ، يمانبەك، Darkhan Juzz, قايرات نۇرتاس، Raim & Artur, Rin’Go, Sadraddin, Say Mo, Son Pascal, M’Dee, V$XV PRiNCE, عالىمجان مولدانازار جانە باسقا دا كوپتەگەن اۆتورلار كورسەتىلگەن. تىزىمدە شەتەلدىك انشىلەر دە بار.
