Qazaq avtorlyq qoǵamy 400-den astam ánshi men avtor óz qalamaqysyn áli almaǵanyn málimdedi, dep habarlaıdy “Adyrna” ulttyq portaly.
«Qazaqstan avtorlyq qoǵamynyń» (KazAK) bas dırektory Aınur Esendikovanyń aıtýynsha, 400-den astam kompozıtor men oryndaýshy, onyń ishinde tanymal juldyzdar da bar, áli kúnge . deıin óz týyndylary úshin qalamaqy ala almaı júr. Buǵan negizgi sebep – avtorlarmen baılanys ornatýdyń qıyndyǵy.
“Avtorlyq jáne sabaqtas quqyqtar týraly zańǵa sáıkes, biz avtorlar men quqyq ıelerin óz betimizshe izdeýge mindettimiz. Osyǵan oraı, bizdiń saıtta arnaıy resmı tizim jarııalanǵan. Bul – zańnyń talaby”, – dedi Esendikova brıfıngte.
Onyń aıtýynsha, qoǵam qyzmetkerleri avtorlarmen baılanys ornatý úshin barlyq múmkindikti paıdalanyp jatyr: messendjerler, Instagram, Telegram, WhatsApp arqyly habarlasady, telefon shalady. Biraq jaýap alý árdaıym múmkin emes.
“Keıbir ánshiler baılanysqa shyǵady. Biraq kóbiniń atynan sóıleıtin menedjerleri men prodıýserleri bar, olar keıde bizdi alaıaqtar dep oılap, jaýap bermeıdi. Bul jalpy úderisti tejeıdi”, – deıdi Esendikova.
Osy rette ol barlyq quqyq ıelerine úndeý jasady:
“Eger bizden habarlama kelse – mindetti túrde jaýap berińizder. Biz sizderdiń aqshalaryńyzdy qaıtarǵymyz keledi. Bul – sizdiń zańdy tabysyńyz”, – dep túıindedi ol.
KazAK “izdeýdegi” ártisterdiń tizimin jarııalady. Tizimde baılanys málimetteri ashyq túrde qoljetimdi ónerpazdardyń da bolýy. 2024 jyly jarııalanǵan bul tizimde Dımash Qudaıbergen, Áli Oqapov, Imanbek, Darkhan Juzz, Qaırat Nurtas, Raim & Artur, Rin’Go, Sadraddin, Say Mo, Son Pascal, M’Dee, V$XV PRiNCE, Ǵalymjan Moldanazar jáne basqa da kóptegen avtorlar kórsetilgen. Tizimde sheteldik ánshiler de bar.
