ەلوردادا تۇركسوي حالىقارالىق ۇيىمىنىڭ ماراپاتتارىن تابىستاۋ ءراسىمى ءوتتى، دەپ حابارلايدى "ادىرنا" ۇلتتىق پورتالى.
سالتاناتتى شارادا قازاقستاننىڭ حالىق ءارتىسى ديماش قۇدايبەرگەن تۇركى الەمى مادەنيەتىن دامىتۋعا قوسقان ەلەۋلى ۇلەسى ءۇشىن ۇيىمنىڭ ەڭ جوعارى ناگراداسى سانالاتىن «تۇركى الەمىنىڭ مادەني ەلشىسى» اتاۋلى وردەنىمەن ماراپاتتالدى.
سونداي-اق قازاقستاننىڭ ەڭبەك سىڭىرگەن قايراتكەرى، اكتريسا سامال ەسلياموۆا تۇركى جانە الەمدىك كينو ونەرىنىڭ دامۋىنا قوسقان ايرىقشا ۇلەسى ءۇشىن «تۇركى الەمىنىڭ ۇزدىك ءارتىسى» نوميناتسياسى بويىنشا تۇركسوي-دىڭ ارنايى جۇلدەسىنە يە بولدى.
ونەر يەلەرىن قازاقستان رەسپۋبليكاسى پرەمەر-ءمينيسترىنىڭ ورىنباسارى – مادەنيەت جانە اقپارات ءمينيسترى ايدا بالاەۆانىڭ اتىنان قر مادەنيەت جانە اقپارات ۆيتسە-ءمينيسترى ايبەك سىدىقوۆ قۇتتىقتادى. ول قازاقستاندىق ونەر قايراتكەرلەرىنىڭ جەتىستىكتەرى تۇركى ەلدەرى اراسىنداعى مادەني بايلانىستى نىعايتىپ، ۇلتتىق ونەردىڭ حالىقارالىق دەڭگەيدە تانىلۋىنا ىقپال ەتىپ وتىرعانىن اتاپ ءوتتى.
ءوز كەزەگىندە سۇلتان راەۆ ماراپاتتاردىڭ ماڭىزىنا توقتالىپ، قازاقستاندىق مادەنيەت وكىلدەرىنىڭ ورتاق تۇركى مادەني كەڭىستىگىن دامىتۋداعى ءرولى ەرەكشە ەكەنىن ايتتى. ونىڭ سوزىنشە، ونەر ارقىلى تۇركى الەمىن بىرىكتىرىپ جۇرگەن تۇلعالاردى قۇرمەتتەۋ – مادەني ىنتىماقتاستىقتى نىعايتۋدىڭ ماڭىزدى بەلگىسى.
