ماروككونىڭ فەس قالاسىنداعى فەس-سايسس حالىقارالىق اۋەجايىندا (FEZ) 11 ءساۋىر كۇنى شاعىن جەكە ۇشاق ۇشۋ-قونۋ جولاعىنان شىعىپ كەتىپ، ەكيپاج مۇشەلەرى جاراقات الدى، دەپ حابارلايدى “ادىرنا” ۇلتتىق پورتالى.
Morocco World News باسىلىمىنىڭ حابارلاۋىنشا، H25B ۇلگىسىندەگى ۇشاق قونۋ كەزىندە ۇشۋ-قونۋ جولاعىنان شىعىپ كەتكەن. باستاپقىدا بۇل وقيعا اپات رەتىندە حابارلانعانىمەن، كەيىن ازاماتتىق قورعانىس قىزمەتى ۇشاقتىڭ ۇشۋ-قونۋ جولاعىنىڭ سوڭىندا باعىتىن ۇستاي الماي، اپاتقا ۇشىراعانىن مالىمدەدى.
ۇشاقتا ءۇش ەكيپاج مۇشەسى بولعان، ولاردىڭ بارلىعى جاراقات الىپ، اۋرۋحاناعا جەتكىزىلدى. وقيعا كەزىندە ۇشاقتا جولاۋشىلار بولماعان.
قازىرگى ۋاقىتتا ماروككونىڭ كولىك جانە لوگيستيكا مينيسترلىگى اپاتتىڭ سەبەپتەرىن انىقتاۋ ءۇشىن تەرگەۋ جۇرگىزىپ جاتىر. فەس قالاسىنىڭ توتەنشە جاعدايلارعا ارەكەت ەتۋ توپتارى اپات ورنىن دەرەۋ قورشاپ، قوسىمشا قاۋىپتەردىڭ الدىن الدى.
فەس-سايسس اۋەجايى — ماروككونىڭ فەس قالاسىنا قىزمەت كورسەتەتىن حالىقارالىق اۋەجاي. اۋەجايدا ۇزىندىعى 3200 مەترلىك ۇشۋ-قونۋ جولاعى بار جانە ول جىل سايىن ميلليوننان استام جولاۋشىنى قابىلدايدى .
