اقش-تا كەزەكتى اۋە اپاتى ورىن الدى، دەپ حابارلايدى "ادىرنا" ۇلتتىق پورتالى.
جەرگىلىكتى ۋاقىت بويىنشا 31 قاڭتار كەشكى 18:30-دا (قازاقستان ۋاقىتىمەن 1 اقپان، 02:30) فيلادەلفيانىڭ سولتۇستىك-شىعىس اۋەجايىنان ۇشىپ شىققان Learjet 55 مەديتسينالىق ۇشاعى تۇرعىن ۇيلەرگە قۇلاپ، جويقىن ورتكە سەبەپ بولدى.
ۇشاق بورتىندا ەكى ۇشقىش، ەكى دارىگەر، ناۋقاس جانە ونىڭ تۋىسى بولعان. اقش-تىڭ فەدەرالدى اۆياتسيا باسقارماسىنىڭ مالىمەتىنشە، اپات اۋەگە كوتەرىلگەننەن 30 سەكۋند وتكەن سوڭ ورىن العان.
كۋاگەرلەردىڭ ايتۋىنشا، ۇشاق كوتتمان داڭعىلى مەن رۋزۆەلت بۋلۆارى ماڭىنداعى تۇرعىن ۇيلەرگە سوعىلعان. سالدارىنان بىرنەشە ءۇي ورتەنىپ، جانىنداعى كولىكتەر دە زاقىمداندى. جارىلىستان كەيىن گاز قۇبىرى زاقىمدالىپ، ءورتتى ءسوندىرۋ قيىنداي ءتۇستى.
فيلادەلفيا مەرى شەرەلل پاركەر ءباسپاسوز ءماسليحاتىندا التى ادامنىڭ اۋرۋحاناعا جەتكىزىلگەنىن، بىرنەشە ءۇيدىڭ قاتتى بۇلىنگەنىن مالىمدەدى. قازا تاپقاندار سانى ءالى ناقتىلانباعان.
اقش-تىڭ Fox News تەلەارناسى اپاتتىڭ نەگىزگى سەبەبى ۇشاقتاعى وتىن مەن مەديتسينالىق ماقساتتاعى وتتەگى باللوندارىنىڭ قوسىلۋى سالدارىنان بولعان جارىلىس دەگەن بولجام ايتتى. توتەنشە جاعدايلار قىزمەتكەرلەرى McDonald’s مەيرامحاناسىنىڭ ماڭىنان وتتەگى باللونىن تاۋىپ، ونى تەكسەرۋگە جىبەرگەن.
ۇشاق تولىق جانارماي قۇيىلعان كۇيدە ميسسۋري شتاتىنا باعىت العانى انىقتالدى. ساراپشىلاردىڭ پىكىرىنشە، ۇشاقتاعى مەديتسينالىق جابدىقتاردىڭ جانعىش زاتتارمەن بايلانىسۋى اپاتقا سەبەپ بولۋى مۇمكىن.
اپاتقا قاتىستى اقش پرەزيدەنتى دونالد ترامپ Truth Social جەلىسىندە ءوز پىكىرىن ءبىلدىردى.
"فيلادەلفيادا تاعى دا اۋە اپاتى ورىن الدى. كوز جۇمعان جازىقسىز جاندارعا قايعىرىپ كوڭىل ايتامىن. فەدەرالدى ورگاندار وقيعانى تولىق باقىلاۋعا الدى. جەدەل ارەكەت ەتۋ قىزمەتتەرى كەرەمەت جۇمىس اتقارۋدا. جاقىن ارادا تولىق اقپارات بەرىلەدى،" – دەپ جازدى ول.
اپاتتىڭ ۆيدەوسى ينتەرنەتتە تارادى. كادرلاردان ۇشاقتىڭ جەرگە قاتتى جىلدامدىقپەن قۇلاپ، ۇلكەن جارىلىس بولعانىن كورۋگە بولادى.
قازىرگى ۋاقىتتا تەرگەۋ جۇمىستارى باستالدى. اقش-تىڭ اۆياتسيا قاۋىپسىزدىگى باسقارماسى اپاتتىڭ ناقتى سەبەبىن انىقتاۋ ءۇشىن ارنايى كوميسسيا قۇردى.
