ازەربايجان، تۇركيا جانە گرۋزيا 11 قاراشادا گرۋزيا اۋماعىندا تۇركيا اسكەري-اۋە كۇشتەرىنە تيەسىلى C-130 اسكەري كولىك ۇشاعىنىڭ اپاتىن تەرگەۋ ءۇشىن بىرلەسكەن حالىقارالىق توپ قۇردى. بۇل تۋرالى گرۋزيانىڭ ءبىرىنشى قوعامدىق تەلەارناسى جازدى، دەپ حابارلايدى «ادىرنا» ءتىلشىسى.
ەلدىڭ ىشكى ىستەر ءمينيسترى گەلا گەلادزە ىزدەستىرۋ-قۇتقارۋ جۇمىستارى تۇركيا تاراپىمەن تۇراقتى جۇرگىزىلىپ جاتقانىن ايتتى.
«قازىرگى ۋاقىتتا 18 ادامنىڭ ءمايىتى تابىلدى, تاعى ەكى ادامدى ىزدەۋ جۇمىستارى جالعاسۋدا. ءبىز حالىقارالىق ىزدەستىرۋ-قۇتقارۋ توبىن قۇردىق جانە تۇركيا ءىىم-مەن تۇراقتى بايلانىستامىز. تۇركيالىق ارىپتەستەرىمىز وپەراتسياعا قوسىلىپ، ىزدەۋ جۇمىستارىن بىرلەسىپ جۇرگىزۋدە. بۇل اسكەري ۇشاق بولعاندىقتان، ەگجەي-تەگجەيلى اقپاراتتى تۇركيا تاراپىمەن بىرگە جاريالايمىز»، – دەدى مينيستر.
News Georgia اگەنتتىگىنىڭ حابارلاۋىنشا، ۇشاقتا F-16 جويعىشتارىنا ارنالعان مەحانيكالىق بولشەكتەر بولعان، ال بورتتا 20 تەحنيكالىق قىزمەت كورسەتۋ مامانى وتىرعان.
ازەربايجاننىڭ APA اگەنتتىگى ناقتىلاعانداي، اپاتقا ۇشىراعان C-130 ۇشاعىندا 8 قاراشادا باكۋدەگى اسكەري پارادقا قاتىسقان F-16 Fighting Falcon ۇشاقتارىنا تەحنيكالىق قىزمەت كورسەتكەن ماماندار بولعان.
سونىمەن قاتار تۇركيا اپات ورنىن زەرتتەۋ ءۇشىن گرۋزياعا Akinci ۇشقىشسىز ۇشۋ اپپاراتىن جىبەرگەن. ءدال وسىنداي درون 2024 جىلى يران پرەزيدەنتىنىڭ تىكۇشاعى قۇلاعان كەزدە ىزدەۋ وپەراتسيالارىندا دا قولدانىلعان ەدى.
باق مالىمەتىنشە، اپاتقا ۇشىراعان ۇشاق ۇزاق جىلدار بويى پايدالانىلعان, ول سوڭعى رەت كۇردەلى جوندەۋدەن 2020 جىلى وتكەن.
ەسكە سالايىق، 11 قاراشادا ازەربايجاننان تۇركياعا باعىت العان C-130 اسكەري ۇشاعى گرۋزيا اۋماعىندا اپاتقا ۇشىراعان. تۇركيانىڭ قورعانىس مينيسترلىگىنىڭ مالىمەتىنشە، بورتتا بولعان 20 تۇرىك اسكەري قىزمەتشىسىنىڭ ەشقايسىسى ءتىرى قالماعان.
