تاراز قالاسىندا ەكپە سالۋ قىزمەتىن كورسەتكەن ەم-شارا كابينەتىنە بارعان ەكى ەر ادام انافيلاكتيكالىق شوكتان كوز جۇمدى، دەپ حابارلايدى "ادىرنا" ۇلتتىق پورتالى كتك تەلەارناسىنا سىلتەمە جاساپ.
29 جاستاعى يسلامبەك ەسىمدى ازامات جولسەرىك بولىپ جۇمىس ىستەيدى. ول ساپارعا شىعار الدىندا تاماعىن ەمدەتپەك بولىپ، ەم-شارا كابينەتىنە بارعان. بىراق دارىگەردىڭ نۇسقاۋلىعى بولماعان. سوعان قاراماستان، سىناما جاسالماي، انتيبيوتيك بىردەن ەگىلگەن. ناۋقاس دارىگە توزىمسىزدىك تانىتىپ، ەسىنەن تانىپ قالعان. الايدا العاشقى مەديتسينالىق كومەك كورسەتىلمەگەن.
«بالام 15 مينۋت بويى جان تاپسىرماي ارپالىستى. بىراق كومەك كورسەتىلمەدى. ادرەنالين دە بولماعان. العاشقى كومەككە قاجەتتى ءدارى-دارمەك مۇلدە بولماعان»، – دەيدى مارقۇمنىڭ اكەسى تەمىرحان ۇسەنوۆ.
مارقۇمعا ەكپە سالعان مەيىربيكەنىڭ دە ارنايى رۇقسات قۇجاتى بولماعانى انىقتالدى. ەم-شارا بولمەسىنىڭ يەسى ءوز كىناسىن مويىنداماي، جەدەل جاردەمدى كەشىككەنى ءۇشىن كىنالادى.
وسى وقيعادان بەس كۇن وتكەن سوڭ ءدال وسىنداي جاعداي تاعى ءبىر ەمدەۋ ورتالىعىندا قايتالاندى. 50 جاستاعى ەرلان اتابەكوۆ تە انتيبيوتيك سالدىرعان سوڭ انافيلاكتيكالىق شوكتان قازا تاپتى. مارقۇمنىڭ جۇبايى ءمولدىر مەكەمتاستىڭ ايتۋىنشا، سىناما ەكپە قولىنا ەمەس، بىردەن جامباسىنا سالىنعان. جەدەل جاردەم كەلگەنشە كۇيەۋى كوز جۇمعان.
«كۇيەۋىمدى تىرىدەي الىپ كەلىپ، ءولى دەنەسىن الىپ شىقتىم. قازىر ەكى بالامەن جەسىر قالدىم»، – دەيدى مارقۇمنىڭ جارى.
جامبىل وبلىستىق مەديتسينالىق قىزمەت جانە فارماتسەۆتيكانى باقىلاۋ دەپارتامەنتى اتالعان ەمدەۋ ورىندارىنىڭ ەكپە سالۋعا ليتسەنزياسى بولماعانىن راستادى. قازىر قالاداعى بارلىق پروتسەدۋرالىق كابينەتتەر تەكسەرىلىپ جاتىر.
ال پوليتسيا دەپارتامەنتى ەكى ولىمگە بايلانىستى قىلمىستىق ءىس قوزعاپ، سوتقا دەيىنگى تەرگەۋ جۇرگىزۋدە.
