بۇگىن تاراز قالاسىندا «تاراز – قولونەرشىلەر قالاسى» IV حالىقارالىق فەستيۆالى باستاۋ الدى. ەكى كۇنگە جوسپارلانعان فەستيۆال اياسىندا قولونەر تۋىندىلارىنىڭ كورمەسى، شەبەرلىك ساعاتتارى، عىلىمي-تاجىريبەلىك كونفەرەنتسيا، ءسان كورسەتىلىمى، جارمەڭكە سونداي-اق، قورىتىندى گالا كونتسەرت ۇيىمداستىرىلادى.
«كونە تاراز» تاريحي ەتنو-مادەني كەشەنىندە ءوتىپ جاتقان مادەني-كوپشىلىك شاراعا تاجىكستان، قىرعىزستان، وزبەكستان سەكىلدى الىس-جاقىن شەتەلدەن 33 قولونەرشى قاتىسۋدا.
اۋقىمدى فەستيۆال دۇنيەجۇزىلىك قولونەرشىلەر كەڭەسىنىڭ جانە شەتەلدىك قولونەرشىلەردىڭ قاتىسۋىمەن وتكەن ءباسپاسوز كونفەرەنتسياسىنان باستالدى. ال، ءىس-شارانىڭ نەگىزگى اشىلۋ سالتاناتىنا قر پرەزيدەنتىنىڭ كەڭەسشىسى مالىك وتارباەۆ پەن جامبىل وبلىسى اكىمى ەربول قاراشوكەەۆ جانە بىرقاتار ءماجىلىس دەپۋتاتتارى مەن ءوڭىردىڭ زيالى قاۋىم وكىلدەرى قاتىستى. ەل تۇتقاسىن ۇستاعان ازاماتتار ەتنو-مادەني كەشەندە بوي كوتەرگەن كيىز ۇيلەرگە باس سۇعىپ، قۇندى قولونەر تۋىندىلارىن تاماشالادى.
ايتا كەتەرلىگى، كەشەندە قۇرىلعان ءاربىر التى قاناتتى اق ءۇي قازاقتىڭ ۇلتتىق سالت-داستۇرىنەن سىر شەرتەتىن سيۋجەتتىك وقيعالارعا نەگىزدەلىپ، بەزەندىرىلگەن.
فەستيۆالدىڭ اشىلۋ سالتاناتىندا ءسوز العان ايماق باسشىسى ەربول شىراقپايۇلى مۇنداي رۋحاني الاڭ تاجىريبە الماسۋعا جول اشىپ قانا قويماي، تىڭ يدەيالاردىڭ تۋىنا، باۋىرلاس ەلدەر اراسىنداعى شىعارماشىلىق بايلانىستىڭ نىعايۋىنا سەرپىن بەرەتىنىن العا تارتتى.
– تاراز – تەك كونە شاھار ەمەس. تاراز – ۋاقىتتىڭ تاڭباسىن ساقتاعان، وركەنيەتتەر ءۇنىن جەتكىزگەن، ۇلى جىبەك جولىنىڭ بويىندا ادامزات مادەنيەتىنىڭ التىن ارقاۋىنا اينالعان قاسيەتتى مەكەن. ەكى مىڭ جىلدان استام تاريحى بار قالا عاسىرلار بويى سان ءتۇرلى حالىقتاردى تابىستىرىپ، ونەر مەن ءداستۇردىڭ ۇزىلمەس جەلىسىن قالىپتاستىردى. سوندىقتان تاراز – شەجىرە، تاراز – تاعىلىم، تاراز – رۋح. 2022 جىلى قالامىزدىڭ دۇنيەجۇزىلىك قولونەرشىلەر قالالارى تىزىمىنە ەنۋى – ەل مەرەيىن وسىرگەن ايتۋلى جەتىستىك. وسى مارتەبە – اتا-بابادان امانات بولعان ۇلتتىق قولونەرىمىزدىڭ جاھاندىق دەڭگەيدە مويىندالعانىنىڭ ايقىن دالەلى. بۇگىنگى باسقوسۋ – مازمۇنى تەرەڭ، ماعىناسى ايرىقشا مادەني كەڭىستىك، – دەدى ءوڭىر باسشىسى ءوز سوزىندە.
ال، ءدال قازىر اتالعان كەشەن اۋماعىندا ورنالاسقان شەرحان مۇرتازا اتىنداعى رۋحانيات جانە تاريحتانۋ ورتالىعىندا بەلگىلى عالىمداردىڭ قاتىسۋىمەن ء«داستۇر جانە قازىرگى زامان» اتتى حالىقارالىق عىلىمي-تاجىريبەلىك كونفەرەنتسيا وتۋدە.
كەشكى ساعات 19:00-دە «قوڭىر» توبى، «HasSak» قازاق ەتنو-فولكلورلىق ءانسامبلى، ناركەنجە سەرىكباەۆا جانە جەرگىلىكتى ونەرپازداردىڭ قاتىسۋمەن گالا-كونتسەرت پەن قولونەرشىلەردىڭ ءسان كورسەتىلىمى وتەدى دەپ جوسپارلانعان.
قىزىعى سول، ءىس-شارانىڭ جوعارى دەڭگەيدە وتۋىنە تولاسسىز جاۋعان نوسەر دە كەدەرگى بولمادى. شەت مەملەكەتتەن كەلگەن قوناقتار مەن جەرگىلىكتى تۇرعىندار قۇددى ءبىر «ناۋرىزنامانىڭ» ونكۇندىگى ساۋىردە دە جالعاسىن تاۋىپ جاتقانداي اسەر قالدىرعانىن ايتادى.
