استانادا تۇرىپ جاتقان ۇلى وتان سوعىسىنىڭ التى ارداگەرىنە جەڭىستىڭ 80 جىلدىعىنا وراي 5 ميلليون تەڭگەدەن الەۋمەتتىك تولەم بەرىلدى، دەپ حابارلايدى "ادىرنا" ۇلتتىق پورتالى ەلوردا اكىمدىگىنىڭ رەسمي سايتىنا سىلتەپ.
سونىمەن قاتار، جەڭىلدىكتەر بويىنشا ۇوس ارداگەرلەرىنە تەڭەستىرىلگەن ساناتتاعى ازاماتتارعا – سوعىس كەزىندە اسكەري قىزمەت وتكەرگەندەرگە، فاشيستىك گەرمانياعا قارسى كۇرەسكە قاتىسقاندارعا، لەنينگراد قورشاۋىندا ەڭبەك ەتكەندەرگە، كونتسلاگەرلەردىڭ كامەلەتكە تولماعان تۇتقىندارىنا جانە باسقا دا وسىعان ۇقساس مارتەبەدەگى ادامدارعا – 45 ايلىق ەسەپتىك كورسەتكىش (176 940 تەڭگە) كولەمىندە قارجىلاي كومەك بەرىلەدى.
سونداي-اق باسقا ەلدەردىڭ اۋماعىنداعى اسكەري قاقتىعىستارعا قاتىسقان ارداگەرلەرگە – تاجىك-اۋعان شەكاراسىنداعى، يراكتاعى حالىقارالىق بىتىمگەرشىلىك وپەراتسيالارىنا جانە تاۋلى قاراباقتاعى ۇلتارالىق قاقتىعىستارعا قاتىسقاندارعا دا 45 اەك مولشەرىندە تولەم تاعايىندالعان.
ال تىل ەڭبەككەرلەرى، قايتىس بولعان سوعىس ارداگەرلەرىنىڭ جۇبايلارى جانە قازا تاپقان اسكەري قىزمەتشىلەردىڭ وتباسىلارىنا 15 اەك (58 980 تەڭگە) كولەمىندە بىرجولعى الەۋمەتتىك كومەك كورسەتىلەدى.
تولەمدەر ءساۋىر ايىنىڭ سوڭىنا دەيىن تولىقتاي جۇزەگە اسىرىلادى.
ايتا كەتەيىك، ۇكىمەتتىڭ قاۋلىسىمەن جەڭىستىڭ 80 جىلدىعىنا ارنالعان مەرەكەلىك ءىس-شارالار جوسپارى بەكىتىلگەن بولاتىن.
