14 جەلتوقسان كۇنى استانا قالاسىندا قازاقستان مەن يسپانيا اراسىنداعى ديپلوماتيالىق قاتىناستارعا 30 جىل تولۋىنا وراي، تانىمال يسپان جازۋشىسىنىڭ قاتىسۋىمەن ادەبي كەش وتەدى، دەپ جازادى "ادىرنا" ۇلتتىق پورتالى.
حاۆەر مورو – بەستسەللەرگە اينالعان «Pasión India» كىتابىنىڭ اۆتورى. بۇل تۋىندى 22 تىلگە اۋدارىلىپ، الەم وقىرماندارى اراسىندا ۇلكەن سۇرانىسقا يە بولعان. قالامگەر وتىزدان اسا ەڭبەك جازىپ، ادەبيەت سالاسىندا «Premio Planeta»، «Christopher Award» سياقتى جۇلدەلەردى يەلەنگەن.
يسپانيا – قازاقستاننىڭ تاۋەلسىزدىگىن مويىنداعان جانە ونىمەن ستراتەگيالىق سەرىكتەستىك تۋرالى كەلىسىمگە قول قويعان ەۋروپاداعى العاشقى ەلدەردىڭ ءبىرى. قازاق ادەبيەتى مەن مادەنيەتىنە يسپان حالقىنىڭ كوزقاراسى ەرەكشە. وعان دالەل رەتىندە قازاق ادەبيەتىن، قازاق پوەزياسىن يسپان جۇرتشىلىعىنا تانىتقان بەلگىلى جازۋشى حۋستو حورحە پادروندى اتاپ وتۋگە بولادى. حۋستو حورحە قازاق اقىندارى حاقىندا جازعان ماقالالارىندا قازاق پوەزياسى تۋرالى وي قوزعاۋى، ادەبيەتىمىزدى يسپان جۇرتىنا جەتكىزۋى ەكى ەل اراسىندا ادەبي بايلانىستى قالىپتاستىردى. قازاق ادەبيەتى جاڭا قاتىناستار مەن كوزقاراستارعا جول اشىپ، 2015 جىلى حۋستو حورحەنىڭ «توزاق شەڭبەرلەرى» («Los circculos del infirno») اتتى كىتابى اقىن تاناكوز تولقىنقىزىنىڭ اۋدارماسىمەن يسپان جانە قازاق تىلدەرىندە باسىلىپ شىقتى. ال 2017 جىلى «قازاق اقىندارىنىڭ انتولوگياسى» اتتى كولەمدى ەڭبەك العاش رەت يسپان تىلىنە اۋدارىلىپ، كىتاپتىڭ تۇساۋكەسەرى مادريد قالاسىندا ءوتتى.
سونىمەن قاتار ادەبي كەزدەسۋدە اقىن، قازاقستاننىڭ ەڭبەك سىڭىرگەن قايراتكەرى، حالىقارالىق «الاش» ادەبي سىيلىعىنىڭ يەگەرى، «دارىن» مەملەكەتتىك جاستار سىيلىعىنىڭ لاۋرەاتى، قازاقستان جازۋشىلار وداعى نىڭ توراعاسى داۋلەتكەرەي كاپۇلىنىڭ «بالبال زارى» (يس. «El llanto del balbal») اتتى يسپان تىلىنە اۋدارىلعان كىتابىنىڭ تۇساۋكەسەرى وتەدى.
اتالمىش شاراعا يسپانيا كورولدىگىنىڭ قازاقستانداعى توتەنشە جانە وكىلەتتى ەلشىسى حورحە ۋربيولا لوپەس دە مونتەنەگرو جانە الىبەك اسقارۇلى، جانات اسكەربەكقىزى، وڭايگۇل تۇرجان، تاناكوز تولقىنقىزى، ولجاس قاسىم، ەربول بەيىلحان سىندى قالامگەرلەر قاتىسادى.
ۇيىمداستىرۋشىلار: يسپانيا مەملەكەتىنىڭ قازاقستانداعى ەلشىلىگى، قازاقستان جازۋشىلار وداعى استانا قالالىق فيليالى، ۇلتتىق اكادەميالىق كىتاپحانا جانە «فوليانت» باسپاسى
ەستەرىڭىزگە سالساق، فوليانت باسپاسىنان يسپاندىق جازۋشىلار – ارتۋرو پەرەس-رەۆەرتەنىڭ «قۇرساۋ نەمەسە ءولىم ۇستىندەگى ويىن»، ميگەل دە سەرۆانتەستىڭ «دون كيحوت» روماندارى، روسيو بونيليانىڭ بالالارعا ارنالعان «كورشىلەر»، «تورعاي بولعىم كەلمەيدى»، «اتام جانە مەن» تۋىندىلارى قازاق تىلىندە جارىق كوردى. سونداي-اق «فوليانت» باسپاسى يسپانيا ەلشىلىگىنىڭ كومەگىمەن جاس جازۋشى ميگەل رەينا ءانتوليننىڭ «Luces en el mar» (تەڭىز شۇعىلاسى) رومانىن قازاق تىلىنە اۋدارۋ جۇمىسىن قولعا الدى.
كەزدەسۋ وتەتىن ورىن: استانا قالاسى، دوستىق كوشەسى 11 (ۇلتتىق اكادەميالىق كىتاپحانانىڭ كونستيتۋتسيا زالى)
كۇنى: 14 جەلتوقسان ساع: 11:00
"ادىرنا" ۇلتتىق پورتالى
