وككۋپاتسيادان بوساتىلعان تەرريتوريالاردى مينادان تازارتۋ ءۇشىن ۋكراينا ازەربايجاننان كومەك سۇرادى، دەپ حابارلايدى "ادىرنا" ۇلتتىق پورتالى inbusiness.kz سايتىنا سىلتەپ.
سوعىس سالدارىنان بۇگىندە ۋكراينا تەرريتورياسىنىڭ تورتتەن ءبىرى – 25%-ىنان استامى مينالارمەن، سناريادتارمەن جانە باسقا دا قاۋىپتى، جارىلعىش زاتتارمەن لاستانعان.
وسى ورايدا دامىعان ەلدەر مەن وزگە سەرىكتەستەرى كيەۆكە مينادان تازارتۋ شارالارى ءۇشىن مول قارجى بولۋدە. بىراق سول قاراجاتتى يگەرىپ، اۋماقتاردى مينادان ارىلتۋمەن اينالىساتىن كومپانيالار، سونداي-اق جۇمىس كۇشى تاپشى.
سوندىقتان تەرريتوريالاردى جارىلعىش زاتتاردان ادالاۋ ماسەلەسىندە ۋكراينا ازەربايجانمەن ىنتىماقتاستىقتى تەرەڭدەتۋگە نيەتتى. ويتكەنى باكۋ 2023 جىلعى ءبىر كۇندىك سوعىس ىشىندە ازات ەتكەن تاۋلى قاراباق اۋماعىن مينادان ارىلتۋدا زور ءارى الەمدە تەڭدەسى از تاجىريبە جينادى. ونىڭ ۇستىنە وسى سالادا ماماندارى دا جەتەرلىك.
بۇل ماسەلەنى جوعارعى رادا توراعاسىنىڭ ورىنباسارى ەلەنا كوندراتيۋك قوزعادى. ول وسى ماقساتتا باكۋگە ساپارلاپ قايتقانىن اڭگىمەلەدى.
ءىسساپار باسىرىندا ازەربايجان رەسپۋبليكاسىنىڭ مينادان تازارتۋ اگەنتتىگى توراعاسىنىڭ ءبىرىنشى ورىنباسارى باحرۋز ماممادوۆپەن كەزدەستى. جۇزدەسۋ جابىق ءوتتى جانە ەكى ەل قانداي ۋاعدالاستىققا كەلگەنى ازىرگە جاريا ەتىلمەدى.
"ازەربايجان اتالعان سالادا بىلىكتى كادرلارىن دايارلاپ، مينادان تازارتۋ بويىنشا ۇنەمى ترەنينگتەر جۇرگىزەدى. بۇل پروتسەسكە ايەلدەردى تارتۋ تاجىريبەسى دە ۋكراينا ءۇشىن ماڭىزدى. بۇعان قوسا، وسى ەلدە مينادان تازارتۋعا ارنالعان زاماناۋي ماشينالاردىڭ وتاندىق ءوندىرىسى جولعا قويىلعان. ياعني، بۇل ىستە ازەربايجان وزگەلەرگە كوپ تاۋەلدى ەمەس. تاياۋدا جاياۋ اسكەرگە ارنالعان مينالاردان ارىلتاتىن ءتول ماشينالارىنىڭ ءبىرىن ازەربايجان ۋكرايناعا تابىس ەتتى. بۇگىندە بۇل تەحنيكا حاركوۆ وڭىرىندە جۇمىس ىستەپ جاتىر", – دەدى ەلەنا كوندراتيۋك.
ۋكراينالىق ساياساتكەر ءوز ەلىنىڭ ازەربايجانعا سۇيسىنە قارايتىنىن جاسىرمادى.
"2022 جىلدان 2024 جىل ارالىعىندا ازەربايجاندا 134 مىڭ گەكتار جەر مينادان تولىق تازارتىلعان. 67 مىڭنان استام مينا مەن جارىلعىش زاتتار زالالسىزداندىرىلعان. اسىرەسە، بۇل جۇمىس قاراباق ءوڭىرى تولىعىمەن دەوككۋپاتسيالانعاننان كەيىن كۇشەيتىلدى. مەن ازەربايجان تاراپىنا وتىنىشپەن جۇگىنىپ، بىزگە تانككە قارسى مينالاردى زالالسىزداندىراتىن ماشينانى دا بەرۋدى ءوتىندىم. ازەربايجانمەن مينادان تازارتۋ بويىنشا ىنتىماقتاستىقتى تەرەڭدەتۋدەن وتە ءۇمىتتىمىز!", – دەدى ەلەنا كوندراتيۋك.
حالىقارالىق ساراپشىلاردىڭ بايلامىنشا، بۇگىندە ۋكراينا – الەمدەگى ەڭ كوپ مينالانعان مەملەكەت. ۋكراينا تەرريتورياسىنىڭ 174 مىڭ شارشى شاقىرىمى قاۋىپتى سانالادى. بۇل – 225 سينگاپۋر سىيىپ كەتەتىن ۇلانعايىر جەر. بۇل – ەۋروپانىڭ كەز كەلگەن ەلىنىڭ اۋماعىنان كوپ تەرريتوريا.
جالپى اۋقىمى 5,6 ميلليون گەكتار جەر جاۋ تاراپىنان مينالانعان. ياعني، ارىلتۋدى قاجەت ەتەدى.
ءوز كەزەگىندە ازەربايجان ءولىم سەپكەن جاۋ مينالارىنان ۋكراينالىق جەردى تازالاۋ باعىتىنداعى كومەگىن كەڭەيتۋگە دايارلىعىن بىلدىرگەن. كيەۆ ونىڭ وندىرگەن ميناسىزداندىرۋ كولىكتەرىن ساتىپ الا الادى.
بۇل تۇرعىدا ازەربايجان ءبىر جاعىنان ىزگىلىك ءىس جاساي السا، ەكىنشى جاعىنان، ميناسىزداندىرۋ تەحنيكاسىن ەكسپورتتاۋعا مۇمكىندىگى تۋادى.
