Qarmet كومپانياسى 2024 جىلدىڭ قورىتىندىسى بويىنشا ءوز قىزمەتكەرلەرىنە سىياقى بەرەتىنىن مالىمدەدى، دەپ حابارلايدى "ادىرنا" ۇلتتىق پورتالى.
كومپانيا ۇجىمدىق شارتتا كورسەتىلگەن بارلىق كورسەتكىشتەر تولىق ورىندالماعانىنا قاراماستان، جۇمىسشىلاردىڭ ەڭبەگىن باعالاپ، ولاردى قولداۋ ماقساتىندا وسىنداي شەشىم قابىلداعانىن اتاپ ءوتتى. سىياقى 2024 جىلدىڭ 1 قاڭتارىنان 31 جەلتوقسانىنا دەيىن جۇمىس ىستەگەن قىزمەتكەرلەرگە تولەنەدى. تولەم شارتتارى مەن ساناتتارى كاسىپوداقتارمەن كەلىسىلگەن.
"2024 جىل – كومپانيامىز ءۇشىن تولىققاندى العاشقى جىل بولدى. مەتالل نارىعىنداعى تۇراقسىزدىق پەن قۇرىلىمدىق ماسەلەلەرگە قاراماستان، ۇجىم تاباندىلىقپەن ەڭبەك ەتتى. قىزمەتكەرلەرىمىزدىڭ وسى جاۋاپتى كەزەڭدەگى ەڭبەگىنە العىس رەتىندە سىياقى تولەۋدى ءجون كوردىك", – دەدى Qarmet باس ديرەكتورى ۆاديم باسين.
كومپانيا باسشىلىعى بۇل قادام قىزمەتكەرلەردى ودان ءارى ىنتالاندىرىپ، جاڭا وندىرىستىك جەتىستىكتەرگە جول اشاتىنىنا سەنىمدى.
«بۇل شەشىم Qarmet-ءتىڭ الەۋمەتتىك جاۋاپكەرشىلىك قاعيداتتارىنا ساي ەكەنىن جانە كومپانيا ادام كاپيتالىنا باسىمدىق بەرەتىنىن كورسەتەدى»، – دەپ قوستى «جاقتاۋ» كاسىپوداق توراعاسى ۆيكتور ششەتينين.
