ايدا بالاەۆا پرەمەر-ءمينيستردىڭ ورىنباسارى – مادەنيەت جانە اقپارات ءمينيسترى لاۋازىمىنا تاعايىندالدى. بۇل تۋرالى بۇگىن، 1 جەلتوقساندا اقوردا جازدى، دەپ حابارلايدى «ادىرنا» ءتىلشىسى.
«مەملەكەت باسشىسىنىڭ جارلىعىمەن ايدا عالىمقىزى بالاەۆا قازاقستان رەسپۋبليكاسى پرەمەر-ءمينيسترىنىڭ ورىنباسارى – مادەنيەت جانە اقپارات ءمينيسترى لاۋازىمىنا تاعايىندالدى»،-دەلىنگەن حابارلامادا.
بۇعان دەيىن ءماجىلىس پرەمەر-ءمينيستردىڭ ورىنباسارى – مادەنيەت جانە اقپارات ءمينيسترى لاۋازىمىنا ايدا بالاەۆانىڭ كانديداتۋراسىنا كەلىسىم بەرگەن بولاتىن.
«بۇل ماسەلە «قازاقستان رەسپۋبليكاسىنىڭ پارلامەنتى جانە ونىڭ دەپۋتاتتارىنىڭ مارتەبەسى تۋرالى» كونستيتۋتسيالىق زاڭنىڭ 22-1-بابىنا سايكەس قارالدى»،– دەلىنگەن حابارلامادا.
ايدا عالىمقىزى 1974 جىلعى 4 شىلدەدە الماتى وبلىسىنىڭ جامبىل اۋدانىنداعى جامبىل اۋىلىندا دۇنيەگە كەلگەن. ول 2000 جىلى اباي اتىنداعى الماتى مەملەكەتتىك ۋنيۆەرسيتەتىن، 2007 جىلى قازاق ۇلتتىق اگرارلىق ۋنيۆەرسيتەتىن بىتىرگەن.
1999-2002 جىلدارى – الماتى وبلىستىق اقپارات جانە قوعامدىق كەلىسىم باسقارماسىنىڭ جەتەكشى مامانى، باس مامانى، ءبولىم باستىعى;
2002-2004 جىلدارى – الماتى قالالىق اقپارات جانە قوعامدىق كەلىسىم باسقارماسىنىڭ تالداۋ جانە قوعامدىق-ساياسي ۇردىستەردى ۇيلەستىرۋ ءبولىمىنىڭ باستىعى;
2004 جىلعى قاڭتار مەن قىركۇيەك ارالىعىندا – الماتى قالاسى بويىنشا اقپارات باسقارماسىنىڭ تالداۋ جانە بولجاۋ ءبولىمىنىڭ باستىعى;
2004-2005 جىلدارى – الماتى قالاسى بويىنشا اقپارات باسقارماسى باستىعىنىڭ ورىنباسارى;
2005-2006 جىلدارى – الماتى قالاسىنىڭ ىشكى ساياسات دەپارتامەنتى ديرەكتورىنىڭ ورىنباسارى;
2006-2008 جىلدارى – الماتى قالاسىنىڭ ىشكى ساياسات دەپارتامەنتىنىڭ ديرەكتورى;
2008-2010 جىلدارى – استانا قالاسىنىڭ ىشكى ساياسات باسقارماسىنىڭ باستىعى;
2010-2014 جىلدارى – استانا قالاسى اكىمىنىڭ ورىنباسارى;
2014-2019 جىلدارى – قازاقستان رەسپۋبليكاسى پرەزيدەنتى اكىمشىلىگىنىڭ ىشكى ساياسات ءبولىمىنىڭ مەڭگەرۋشىسى;
2019-2020 جىلدارى – قازاقستان رەسپۋبليكاسى پرەزيدەنتىنىڭ كومەكشىسى – قازاقستان رەسپۋبليكاسى پرەزيدەنتى اكىمشىلىگىنىڭ وتىنىشتەردى قاراۋدى باقىلاۋ ءبولىمىنىڭ مەڭگەرۋشىسى;
2020-2022 جىلدارى (قاڭتار) – اقپارات جانە قوعامدىق دامۋ ءمينيسترى;
2022-2023 جىلدارى (قىركۇيەك) – قازاقستان رەسپۋبليكاسى پرەزيدەنتى اكىمشىلىگى باسشىسىنىڭ ورىنباسارى بولعان.
2023 جىلعى 2 قىركۇيەكتەن باستاپ مادەنيەت جانە اقپارات ءمينيسترى لاۋازىمىن اتقارىپ كەلەدى.
