قازاقستان پرەزيدەنتى قاسىم-جومارت توقاەۆ يتاليا پرەمەر-ءمينيسترى دجوردجا مەلونيگە ارنايى قۇتتىقتاۋ جولدادى، دەپ حابارلايدى “ادىرنا”.
اقوردانىڭ ءباسپاسوز قىزمەتىنىڭ حابارلاۋىنشا، بۇعان ونىڭ باسشىلىعىنداعى كابينەتتىڭ يتاليا تاريحىنداعى ەڭ ۇزاق ۋاقىت قىزمەت اتقارعان ۇكىمەتكە اينالۋى سەبەپ بولعان.
مەملەكەت باسشىسى ءوزىنىڭ ح الەۋمەتتىك جەلىسىندەگى پاراقشاسىندا يتاليا پرەمەر-ءمينيسترىنىڭ ەلدى دامىتۋداعى ەڭبەگى مەن كوشباسشىلىق قاسيەتىن جوعارى باعالادى.
«يتاليا رەسپۋبليكاسىنىڭ تاريحىنداعى ەڭ ۇزاق ۋاقىت قىزمەت اتقارعان ۇكىمەتتىڭ قۇرىلۋىنا بايلانىستى پرەمەر-مينيستر دجوردجا مەلونيگە شىن جۇرەكتەن جىلى لەبىزىمدى بىلدىرەمىن. ونىڭ پاراساتتى ءارى باتىل باسشىلىعى، يتاليانىڭ ۇلتتىق مۇددەلەرى مەن ابىرويىن قورعاۋعا دەگەن بەرىك ۇستانىمى ەل ەكونوميكاسىنىڭ تۇراقتى دامۋىنا جانە حالىقارالىق ارەناداعى بەدەلىنىڭ نىعايۋىنا ىقپال ەتتى»، – دەپ جازدى قاسىم-جومارت توقاەۆ.
سونىمەن قاتار پرەزيدەنت ەكى ەل اراسىنداعى جان-جاقتى بايلانىستارعا توقتالىپ، دجوردجا مەلونيدىڭ استانا مەن ريم اراسىنداعى دوستىق پەن ستراتەگيالىق ارىپتەستىكتى نىعايتۋعا قوسقان جەكە ۇلەسىن ەرەكشە اتاپ ءوتتى.
