QR Mádenıet jáne aqparat mınıstri Aıda Balaeva Prezıdent Qasym-Jomart Toqaevtyń qazirgi álemdik ekonomıkalyq jaǵdaıǵa baılanysty jasaǵan málimdemesine qatysty Facebook paraqshasynda pikir bildirdi, dep habarlaıdy "Adyrna" ulttyq portaly.
Mınıstr óz jazbasynda Memleket basshysynyń sózderinde eldiń bolashaǵyna senim men jaýapty kózqaras aıqyn kórinetinin atap ótti:
"Prezıdentimiz Qasym-Jomart Toqaev jahandyq turaqsyzdyq jaǵdaıynda Qazaqstannyń ustanatyn baǵytyn aıqyndap berdi. Shynynda da, álem buryn-sońdy bolmaǵan ekonomıkalyq daǵdarystyń aldynda tur. Osyndaı kúrdeli kezeńde el tizginin ustap otyrǵan basshynyń sabyrly, baıypty ári senimdi málimdemesi – halyq úshin úlken tirek. Memleket syrtqy qysym men ózgeristerge qaramastan damý jolyn jalǵastyrady. Bul – júıeli ári naqty josparmen júzege asady." – dep jazdy Balaeva.
Ol sondaı-aq Toqaevtyń “daǵdarystyń da óz qaıyry bar” degen sózine erekshe toqtaldy.
"Ár daǵdarys – jańa múmkindik. Prezıdenttiń osy sózi – árbir basshy men qoǵam múshesine oı salýy tıis. Mundaı syn-qater kezeńinde árqaısymyzdan jaýapkershilik pen shuǵyl áreket talap etiledi. Eldiń múddesi bárinen bıik turýy kerek," – dedi mınıstr.
Aıda Balaeva Úkimet pen ákimderge berilgen tapsyrmalardyń naqty iske asatynyna senim bildirip, halyqty sabyr men senimge shaqyrdy.
"Qazirgideı kúrdeli kezeńde birligimiz bekem bolsa, alynbaıtyn asý joq. El Prezıdenti naqty baǵytty kórsetip otyr. Biz sol jolmen nyq qadammen júrýimiz kerek", – dep túıindedi mınıstr óz jazbasyn.
