وزبەكستاندا 2025-2026 جىلعى جىلىتۋ ماۋسىمىندا الەۋمەتتىك قورعالۋعا مۇقتاج وتباسىلارعا 1 ميلليون سۋم (شامامەن 40 488 تەڭگە، 77 اقش دوللارى) كولەمىندە ءبىر رەتتىك ماتەريالدىق كومەك كورسەتىلەدى. بۇل تۋرالى پرەزيدەنت شاۆكات ميرزيوەۆتىڭ 5 ساۋىردە كۇشىنە ەنگەن جاڭا قاۋلىسىندا ايتىلعان، دەپ حابارلايدى "ادىرنا" ۇلتتىق پورتالى.
كومەك «الەۋمەتتىك قورعاۋدىڭ بىرىڭعاي رەەسترى» مەن «كەدەيلەر تىزىلىمىنە» ەنگەن وتباسىلارعا بەرىلەدى. سونىمەن قاتار، جەرگىلىكتى «ماحاللينسكايا سەمەركا» كەڭەسى انىقتايتىن كەلەسى ساناتتاعى ازاماتتار دا كومەككە يە بولادى.
- اسىراۋشىسىنان ايىرىلعان وتباسىلار;
- I نەمەسە II توپتاعى مۇگەدەكتەرى بارلار;
- مۇگەدەك بالالارعا كۇتىم جاسايتىندار;
- ۇزاق ۋاقىت ەمدەلۋدى قاجەت ەتەتىن مۇشەلەرى بار وتباسىلار;
- گاز جانە ورتالىق جىلىتۋ جۇيەسى جوق كوپقاباتتى ۇيلەردە تۇراتىندار.
دەگەنمەن، قوسىمشا تىزىمگە ەنگىزىلەتىن وتباسىلار سانى نەگىزگى رەەستردەگى وتباسىلاردىڭ 40%-ىنان اسپاۋى ءتيىس.
سونىمەن قاتار، 2025 جىلدىڭ 1 مامىرىنان 2027 جىلدىڭ 1 ساۋىرىنە دەيىن الەۋمەتتىك كومەك شەڭبەرىندە ەلەكتر قۋاتى مەن گاز تۇتىنۋدىڭ بازالىق مولشەرىنەن ارتىق پايدالانعانى ءۇشىن وتەماقى دا قاراستىرىلعان. بۇل وتەماقى ايىنا 150 كۆت/ساعاتقا دەيىنگى ارتىق ەلەكتر ەنەرگياسىن تۇتىنۋ ءۇشىن، جىلىتۋ ماۋسىمىندا 250 م³، قالعان كەزەڭدەردە 150 م³ ارتىق تابيعي گاز تۇتىنۋ ءۇشىن تولەنەدى.
قازىرگى تاڭدا وزبەكستاندا 746 مىڭنان استام از قامتىلعان وتباسى تىركەلگەن.
