ءماجىلىس دەپۋتاتتارى قازاقستاندا 18 جاسقا دەيىنگى ءار بالاعا ورتاشا جالاقى مولشەرىندە جالپىعا بىردەي جاردەماقى ەنگىزۋدى ۇسىندى، دەپ حابارلايدى "ادىرنا" ۇلتتىق پورتالى دەرەككوزگە سىلتەپ.
بۇل ماسەلەنى دەپۋتات ايجان سقاقوۆا كوتەردى. ونىڭ ايتۋىنشا، ەلىمىزدە جۇمىس ىستەمەيتىن ايەلدەرگە اي سايىنعى بالا كۇتىمىنە جاردەماقى بىلاي تولەنەدى: ءبىرىنشى بالاعا - 16 802 تەڭگە، ەكىنشىسىنە - 19 865 تەڭگە، ۇشىنشىسىنە - 22 898 تەڭگە، ءتورتىنشى جانە ودان كوپ بالالارعا - 25 961 تەڭگە. بۇل ءبىر بالاعا كۇنىنە 560-865 تەڭگە دەگەن ءسوز، ال ءبىر ءسابيدىڭ تاماعىنا 1018 تەڭگە جۇمسالادى. جاردەماقىنىڭ ىشىندە بالانىڭ اناسىنا اقشا قاراستىرىلماعان.
"ەگەر ەرلى-زايىپتىنىڭ بىرەۋى عانا جۇمىس ىستەسە جانە وتباسىندا ءۇش بالا بولسا، وندا ارقايسىنا 46 مىڭ تەڭگەدەن كەلەدى، بۇل وتە از.
ازىق-تۇلىك، كيىم، ءدارى-دارمەك، ويىنشىقتار، كىتاپتار قانشا تۇراتىنىن بىلەمىز، سونىمەن قاتار ءار وتباسىندا بىردەي پاتەردىڭ كوممۋنال قىزمەتتەرى نەمەسە نەسيە تولەۋ سياقتى باسقا دا كوپتەگەن شىعىندارى بار. ال بالالاردا ەڭ نەگىزگىسى فيزيولوگيالىق قاجەتتىلىكتەر عانا ەمەس، سونىمەن بىرگە ءبىلىم الۋ، دامۋدىڭ دا الەۋمەتتىك قاجەتتىلىكتەرى بار. جانە دە مىنانى ءتۇسىنۋ كەرەك: ەگەر ءبىز بالالار الدىنداعى بورىشىمىز تەك ولاردىڭ امان-ەسەن، تويىپ تاماقتانۋى ءۇشىن جاعداي جاساۋ دەپ ەسەپتەسەك، وندا ولاردان ەرتەڭگى كۇنى ەشبىر ۇمتىلىستى كۇتە المايمىز. جاردەماقىنى ۇلعايتۋ كەرەك", - دەدى دەپۋتات.
دەپۋتات راسىمدەردىڭ كوپتىگى، ولاردى باسقارۋدىڭ قيىندىعى جاردەماقى الۋ كەزىندە سىبايلاس جەمقورلىق سحەمالارىن تۋدىراتىنىن ايتتى.
سونداي-اق، ايجان سقاقوۆا وسال توپتاعى قازاقستاندىقتار ءۇشىن تۇرعىن ءۇي قولجەتىمدى ەمەس ەكەنىنە نازار اۋداردى. ونىڭ ايتۋىنشا، الماتىدا تۇرعىن ءۇي الۋ كەزەگىندە 26 مىڭنان اسا وتباسى تۇر. تۇرعىن ءۇيدى كۇتۋدىڭ ەڭ از مەرزىمى 10 جىلدان اسادى. ول قولدا بار مەملەكەتتىك باعدارلامالار جەتكىلىكسىز دەپ سانايدى.
پارلامەنت مۇشەسى قازاقستاننىڭ حالىق پارتياسى سايلاۋالدى باعدارلاماسىندا ءاربىر وتباسى ءۇشىن 20 سوتىق جەر بەرۋ كەرەك دەپ مالىمدەگەنىن ايتتى. ونىڭ پىكىرىنشە، مۇنى ءبىرىنشى كەزەكتە اۋىلدىق جەرلەردە كوپبالالى، تولىق ەمەس، از قامتىلعان، سونداي-اق، مۇگەدەك بالالارى بار وتباسىلارعا بەرۋ كەرەك.
"قحپ فراكتسياسىنىڭ دەپۋتاتتارى جاردەماقىلار مەن تولەمدەردىڭ بارلىق ءتۇرىن قىسقارتۋدى جانە 18 جاسقا دەيىنگى ءاربىر بالاعا ءبىر امبەباپ جاردەماقى ەنگىزۋدى ۇسىنىپ وتىر، ول قازاقستاندا تۋ جانە ازاماتتىعى قۇقىعى بويىنشا بارلىق بالاعا ورتاشا جالاقى سوماسىندا تاعايىندالادى. جاردەماقى بالانىڭ قاجەتتىلىكتەرىن ءبىزدىڭ پارتيا ازىرلەگەن بالالار تۇتىنۋ قورجىنىنا جانە بالا كۇتىمى كەزەڭىندەگى انانىڭ قاجەتتىلىكتەرىنە سايكەس جابۋى كەرەك", - دەدى سقاكوۆا ءماجىلىس وتىرىسىندا.
"ادىرنا" ۇلتتىق پورتالى
