Ózbekstanda 2025-2026 jylǵy jylytý maýsymynda áleýmettik qorǵalýǵa muqtaj otbasylarǵa 1 mıllıon sým (shamamen 40 488 teńge, 77 AQSh dollary) kóleminde bir rettik materıaldyq kómek kórsetiledi. Bul týraly prezıdent Shavkat Mırzııoevtiń 5 sáýirde kúshine engen jańa qaýlysynda aıtylǵan, dep habarlaıdy "Adyrna" ulttyq portaly.
Kómek «Áleýmettik qorǵaýdyń biryńǵaı reestri» men «Kedeıler tizilimine» engen otbasylarǵa beriledi. Sonymen qatar, jergilikti «mahallınskaıa semerka» keńesi anyqtaıtyn kelesi sanattaǵy azamattar da kómekke ıe bolady.
- asyraýshysynan aıyrylǵan otbasylar;
- I nemese II toptaǵy múgedekteri barlar;
- múgedek balalarǵa kútim jasaıtyndar;
- uzaq ýaqyt emdelýdi qajet etetin músheleri bar otbasylar;
- gaz jáne ortalyq jylytý júıesi joq kópqabatty úılerde turatyndar.
Degenmen, qosymsha tizimge engiziletin otbasylar sany negizgi reestrdegi otbasylardyń 40%-ynan aspaýy tıis.
Sonymen qatar, 2025 jyldyń 1 mamyrynan 2027 jyldyń 1 sáýirine deıin áleýmettik kómek sheńberinde elektr qýaty men gaz tutynýdyń bazalyq mólsherinen artyq paıdalanǵany úshin ótemaqy da qarastyrylǵan. Bul ótemaqy aıyna 150 kVt/saǵatqa deıingi artyq elektr energııasyn tutyný úshin, jylytý maýsymynda 250 m³, qalǵan kezeńderde 150 m³ artyq tabıǵı gaz tutyný úshin tólenedi.
Qazirgi tańda Ózbekstanda 746 myńnan astam az qamtylǵan otbasy tirkelgen.
