تاشكەنتتە وتكەن سىرتقى ينۆەستورلار كەڭەسىنىڭ ءۇشىنشى پلەنارلىق وتىرىسىندا وزبەكستان پرەزيدەنتى 2028 جىلعا دەيىن بيزنەسكە سالىناتىن نەگىزگى سالىق مولشەرلەمەلەرى وزگەرمەيتىنىن مالىمدەدى، دەپ حابارلايدى “ادىرنا” ۇلتتىق پورتالى فەرعاناعا سىلتەپ.
بۇل تۋرالى مەملەكەت باسشىسىنىڭ ءباسپاسوز قىزمەتى حابارلادى.
كەڭەس قۇرامىنا الەمدىك ءىرى كومپانيالار مەن حالىقارالىق قارجى ۇيىمدارىنىڭ وكىلدەرى ەنەدى. جيىندا پرەزيدەنت ءتورتىنشى تاشكەنت ينۆەستيتسيالىق فورۋمىنىڭ ناتيجەلەرىن وڭ باعالاپ، «جاڭا وزبەكستاندى» دامىتۋ جولىنداعى قولداۋلارى ءۇشىن قاتىسۋشىلارعا العىس ءبىلدىردى.
ميرزيوەۆ سوڭعى جىلدارى شەتەلدىك ارىپتەستەرمەن ىنتىماقتاستىق اياسىندا ايتارلىقتاي ىلگەرىلەۋشىلىككە قول جەتكىزىلگەنىن اتاپ ءوتتى. ماسەلەن، وتكەن جىلى ەۋروپالىق قايتا قۇرۋ جانە دامۋ بانكى وزبەكستان ەكونوميكاسىنا رەكوردتىق كولەمدە – 1 ملرد اقش دوللارىنا جۋىق ينۆەستيتسيا سالعان. بۇل كورسەتكىش بويىنشا وزبەكستان ورتالىق ازيا ەلدەرىنىڭ ىشىندە كوش باستادى.
سونداي-اق جەكە كومپانيالار مەن بانكتەرمەن بىرلەسكەن جوبالار پورتفەلى 1 ملرد دوللاردان استى. «جاسىل» ەنەرگەتيكا، قالدىقتاردى وڭدەۋ، ەنەرگيانى ساقتاۋ، «جاسىل» سۋتەگى ءوندىرۋ سەكىلدى باعىتتاردا بىرلەسكەن باستامالار جۇزەگە اسىرىلۋدا.
تسيفرلىق تەحنولوگيا سالاسىندا دا بەلسەندى ىنتىماقتاستىق ورناعان. مىسالى، DataVolt كومپانياسى وڭىردەگى ەڭ ءىرى «جاسىل» دەرەكتەر ورتالىعىن قۇرۋ جوباسىن قولعا السا، Veon جاساندى ينتەللەكت نەگىزىندە ءموبيلدى قوسىمشا ازىرلەۋدە.
«بۇل – شەتەلدىك ينۆەستورلاردىڭ ءبىزدىڭ رەفورمالارىمىز بەن اشىقتىق ساياساتىنا دەگەن جوعارى سەنىمىنىڭ ايقىن دالەلى»، – دەدى ميرزيوەۆ.
سوڭعى ەكى جىلدا وزبەكستاندا شەتەلدىك كاپيتال قاتىسقان 5,5 مىڭ جاڭا كاسىپورىن اشىلىپ، ولاردىڭ جالپى سانى 16 مىڭعا جەتكەن. بيىلعى وتىرىس اياسىندا سالىق جۇيەسىن رەفورمالاۋ مەن ينفراقۇرىلىمدىق جوبالارعا جەكە سەكتوردى تارتۋ سەكىلدى 40-تان استام جاڭا باستاما ىرىكتەلدى.
مەملەكەت باسشىسى اعىمداعى جىلى مەملەكەتتىك-جەكەمەنشىك ارىپتەستىك نەگىزىندە 4,5 ملرد دوللارلىق جوبالار ىسكە قوسىلعانىن مالىمدەدى. بۇل جوبالار جول سالۋ، سۋمەن جابدىقتاۋ، يرريگاتسيا سياقتى سالالاردى قامتيدى.
سونىمەن قاتار، حالىقارالىق ستاندارتتارعا سايكەس قارجىلىق ەسەپتىلىك، ەكولوگيالىق، الەۋمەتتىك جانە كورپوراتيۆتىك باسقارۋ جۇيەسىن ەنگىزۋ بويىنشا نورماتيۆتىك-قۇقىقتىق قۇجاتتار ازىرلەنىپ جاتىر.
پرەزيدەنت بارلىق ۇسىنىستار مۇقيات قارالىپ، ءاربىر باستاما بويىنشا جەكە «جول كارتاسى» ازىرلەنەتىنىن ايتتى. ەلدە جاڭا جۇمىس توپتارى قۇرىلماق.
«تاعى ءبىر مارتە اتاپ وتكىم كەلەدى: ءبىز ينۆەستورلارعا اشىق، ەركىن، تۇراقتى جانە سەنىمدى جاڭا وزبەكستاندى قۇرىپ جاتىرمىز»، – دەپ تۇيىندەدى شاۆكات ميرزيوەۆ.
ۇقساس جاڭالىقتار
