ۋكراينا سىرتقى ىستەر مينيسترلىگى رەسەيدىڭ كريۆوي روگ قالاسىنا جاساعان جويقىن شابۋىلىنان كەيىن بۇۇ قاۋىپسىزدىك كەڭەسى مەن ەقىۇ تۇراقتى كەڭەسىنىڭ شۇعىل وتىرىستارىن وتكىزۋگە باستاما كوتەردى. ۋكراينا سىرتقى ىستەر ءمينيسترىنىڭ ورىنباسارى اندرەي سيبيگا X الەۋمەتتىك جەلىسىندە بۇل شابۋىلدى "سوعىس قىلمىسى" دەپ اتاپ، حالىقارالىق قاۋىمداستىقتى رەسەيدى باتىل ايىپتاۋعا شاقىردى، دەپ حابارلايدى "ادىرنا" ۇلتتىق پورتالى ازاتتىق راديوسىنا سىلتەپ.
جۇما كۇنى ورىن العان بالليستيكالىق زىمىران شابۋىلى سالدارىنان 20 بەيبىت تۇرعىن قازا تاپتى، ونىڭ ىشىندە توعىز بالا بار. تاعى 30-دان استام ادام جاراقات الىپ، اۋرۋحانالاردا ەم قابىلداۋدا. بۇل – 2022 جىلدان بەرى ءبىر مەزەتتە ەڭ كوپ ۋكراين بالاسىنىڭ ءومىرىن قيعان شابۋىل.
سيبيگا ءوزىنىڭ ح الەۋمەتتىك جەلىسىندەگى پاراقشاسىندا جازدى.
"رەسەي كادىمگى تۇرعىن اۋداندى – بالالاردىڭ ويىن الاڭىن – ادەيى نىساناعا الىپ، قۇرباندار سانىن كوبەيتۋ ماقساتىندا كاسسەتالىق قارۋ قولداندى. بۇل سوعىس قىلمىسى، جانە بۇكىل الەم بۇعان كوز جۇما قاراماۋى ءتيىس" – دەپ جازدى.
9 ساۋىرگە دەيىن كريۆوي روگ قالاسىندا ازا تۇتۋ جاريالاندى. 7 ءساۋىر كۇنى قالا تۇرعىندارى ءتورت بالا مەن ءبىر ايەلدى سوڭعى ساپارعا شىعارىپ سالدى. جەرگىلىكتى تۇرعىنداردىڭ كوڭىلى جۇدەپ، ەل ىشىندەگى ازا تۇتۋ كوڭىل-كۇيى كۇشەيدى.
رەسەي تاراپى شابۋىل نىساناسى اسكەري ءمانى بار مەيرامحانا بولدى دەپ مالىمدەدى.
"شابۋىل اسكەري كومانديرلەر مەن باتىس ەلدەرىنىڭ نۇسقاۋشىلارى قاتىسقان جيىن وتكەن ورىنعا باعىتتالدى. رەسەي اسكەرى الەۋمەتتىك نىساندارعا شابۋىل جاسامايدى" – دەدى كرەملدىڭ ءباسپاسوز حاتشىسى دميتري پەسكوۆ.
الايدا حالىقارالىق باق بۇل مالىمدەمەنى جوققا شىعاراتىن دەرەكتەر ۇسىندى. "ناستوياششەە ۆرەميا" جانە "France24" ارنالارى جاريالاعان ۆيدەوماتەريالداردا زىمىران تۇسكەن ورىن – تۇرعىن ءۇي كەشەنى ماڭىنداعى مەيرامحانا – كورسەتىلگەن، وندا اسكەري ادامدار مۇلدەم بايقالمايدى.
ۋكراينا ۇكىمەتى حالىقارالىق قاۋىمداستىقتان ناقتى ارەكەت كۇتۋدە. 8 ساۋىردە وتەدى دەپ جوسپارلانعان بۇۇ قاۋىپسىزدىك كەڭەسىنىڭ جانە ەقىۇ تۇراقتى كەڭەسىنىڭ وتىرىستارىندا بۇل شابۋىلدىڭ زاڭسىزدىعى مەن سالدارى تالقىلانادى.
"رەسەيدىڭ ۋكراين بالالارىن قىرىپ-جويۋىن توقتاتۋعا، سوعىستى توقتاتۋعا باعىتتالعان ناقتى جانە باتىل قادامدارعا بارۋعا شاقىرامىز" – دەدى سيبيگا.
