2025 جىلدىڭ 5 ساۋىرىندە الماتى قالاسىندا “تازا قازاقستان: تابيعات پەن ۇلتتىڭ بىرلىگىندە” اتتى ەكولوگيالىق-مادەني ءىس-شارا ءوتتى. بۇل باستاما – ەكولوگيانى قورعاۋعا باعىتتالعان ەل كولەمىندەگى اۋقىمدى قادامداردىڭ ءبىرى عانا ەمەس، حالىقارالىق دەڭگەيدە مويىندالعان قوعامدىق قوزعالىسقا اينالىپ كەلەدى.
ءىس-شارا “بايتاق” جاسىلدار پارتياسىنىڭ باستاماسىمەن ۇيىمداستىرىلدى. وعان ەلىمىزدىڭ ءار وڭىرىنەن پارتيا مۇشەلەرى، قوعام قايراتكەرلەرى مەن قالا تۇرعىندارى عانا ەمەس، كورشىلەس ەلدەردەن دە رەسمي دەلەگاتسيالار قاتىستى. اتاپ ايتقاندا، قىرعىزستان، وزبەكستان جانە موڭعوليا ەلدەرىنىڭ جاسىلدار پارتياسىنان كەلگەن قوناقتار بۇل جيىننىڭ حالىقارالىق ماڭىزىن ارتتىردى. سونىمەن قاتار، ورتالىق ازيا مەن ەۋروپا ەلدەرىنىڭ رەسمي وكىلدەرىنىڭ قاتىسۋى شارانىڭ اياسىن كەڭەيتىپ، بىرلەسكەن ەكولوگيالىق جاۋاپكەرشىلىكتى كورسەتىپ وتىر.
“بايتاق” جاسىلدار پارتياسىنىڭ توراعاسى ازاماتحان امىرتاەۆ ءوز سوزىندە: “تازا ەكولوگيا – بۇل ءسان ەمەس، بۇل – ۇلتتىڭ دەنساۋلىعى، بولاشاق ۇرپاق الدىنداعى پارىزىمىز. ءبىز تابيعاتتى ساقتاۋ ارقىلى ۇلتتىق بولمىسىمىزدى دا قورعاپ وتىرمىز،” – دەپ اتاپ ءوتتى. ونىڭ ايتۋىنشا، “تازا قازاقستان” قوزعالىسى – ەل ازاماتتارىنىڭ ەكولوگيالىق سانا-سەزىمىنىڭ جاڭا دەڭگەيگە كوتەرىلگەنىن كورسەتەدى.
2024 جىلى “تازا قازاقستان” رەسپۋبليكالىق ەكولوگيالىق اكتسياسى اياسىندا ايتارلىقتاي ناتيجەلەرگە قول جەتكىزىلدى. ماسەلەن، اكتسياعا 6,2 ميلليون ادام قاتىسىپ، بۇل كورسەتكىش الدىڭعى جىلدارمەن سالىستىرعاندا بىرنەشە ەسە ارتقان. سونىمەن قاتار، 1,1 ميلليون توننا قالدىق جينالىپ، 1,6 ميلليوننان استام اعاش وتىرعىزىلعان. بۇعان قوسا، زاڭسىز 4,8 مىڭ قوقىس الاڭى انىقتالىپ، سونىڭ 91%-ى جويىلدى. ازاماتتار ەكولوگيالىق ماسەلەلەر بويىنشا 10,7 مىڭنان استام ءوتىنىش قالدىرعان @TazaQazBot تەلەگرام-بوتى ىسكە قوسىلدى، ولاردىڭ 9,7 مىڭى شەشىمىن تاپتى.
ءىس-شارا اياسىندا اعاش وتىرعىزۋ ناۋقانى، ۇلتتىق ويىندار، قولونەر كورمەسى، دوڭگەلەك ۇستەل فورماتىندا ەكولوگيالىق پىكىرتالاستار ۇيىمداستىرىلدى. بۇل – تابيعاتتى قورعاۋ مەن ۇلتتىق ءداستۇردى ۇشتاستىرۋ ارقىلى ازاماتتاردى جاۋاپكەرشىلىككە ۇندەيتىن ۇتىمدى قادام.
“تازا قازاقستان” — ۇلتتىڭ تابيعاتقا دەگەن قۇرمەتىن زاماناۋي قۇرالدارمەن جەتكىزۋدىڭ، قوعامدىق كۇش-جىگەردى بىرىكتىرۋدىڭ جارقىن ۇلگىسى. بۇل قوزعالىس ەلىمىزدىڭ عانا ەمەس، بۇكىل ايماقتىڭ جاسىل بولاشاعىن قالىپتاستىرۋعا ۇلەس قوسىپ وتىر.
