ۇلىتاۋ وبلىسىنىڭ تۇرعىنى تەمىر-مارگانەتس رۋداسىن رەسەيگە زاڭسىز ساتىپ، 3 ميلليارد تەڭگەدەن استام پايدا تاپقان. بۇل تۋرالى بۇگىن، 7 ساۋىردە قارجى مونيتورينگى اگەنتتىگى ايتتى، دەپ حابارلايدى «ادىرنا» ءتىلشىسى.
«كۇدىكتى 2020-2023 جىلدار ارالىعىندا «شىعىس قاراجال» كارەرىنەن مارگانەتس رۋداسىن ليتسەنزيا مەن جەر قويناۋىن پايدالانۋ كەلىسىمشارتى جوق بولعان كۇيدە زاڭسىز وندىرگەن. ناتيجەسىندە الىنعان رۋدانىڭ كولەمى 16 مىڭ توننادان، ال مەملەكەتكە كەلگەن شىعىن 1,1 ميلليارد تەڭگەدەن استى. قىلمىستىق تابىستى زاڭداستىرۋ ماقساتىندا ول جالعان كەلىسىمدەر جاساپ، وزىنە باقىلاۋداعى جاۋاپكەرشىلىگى شەكتەۋلى سەرىكتەستىكتەر ارقىلى وڭدەلگەن تەمىر-مارگانەتس رۋداسىن ەلىمىزدە جانە رەسەي فەدەراتسياسىندا ساتقان»،—دەلىنگەن حابارلامادا.
قما مالىمەتىنشە، قىلمىستىق تابىس 3,5 ميلليارد تەڭگەدەن اسقان.
سوت ۇكىمىمەن كاسىپكەر كىنالى دەپ تانىلىپ، 6 جىل 8 ايعا باس بوستاندىعىنان ايىرۋ جازاسىنا كەسىلدى. سونداي-اق، ونىڭ 97,8 ميلليون تەڭگەگە باعالانعان مۇلكى، سونىڭ ىشىندە 5 اۆتوكولىك پەن اۋىل شارۋاشىلىعى قوجالىعى تاركىلەندى.
سوت ۇكىمى زاڭدى كۇشىنە ەنگەن جوق.
