4 ساۋىردە رەسەي اسكەرى كريۆوي روگ ورتالىعىنداعى تۇرعىن ۇيلەرگە بالليستيكالىق راكەتالارمەن سوققى جاساعان بولاتىن. قازىرگى تاڭدا قازا تاپقاندار سانى 20-عا جەتتى. بۇل تۋرالى دنەپروپەتروۆسك وبلىستىق اكىمشىلىگىنىڭ باسشىسى سەرگەي لىساك ايتتى، دەپ حابارلايدى «ادىرنا» ءتىلشىسى.
«جاراقات العان تاعى ءبىر ادام اۋرۋحانادا كوز جۇمدى. 57 جاستاعى ەر ادامنىڭ ءومىرى ءۇشىن دارىگەرلەر بارىنشا كۇرەستى. وكىنىشكە قاراي، ونى قۇتقارۋ مۇمكىن بولمادى»،—دەپ جازدى لىساك الەۋمەتتىك جەلىدەگى پاراقشاسىندا.
ايتۋىنشا، 75 ادام جارالانعان. ولاردىڭ اراسىندا بالالار دا بار. زارداپ شەككەندەردىڭ ەڭ كىشىسى — ءۇش ايلىق ءسابي.
بۇعان دەيىن لىساك قالادا جيىرماعا جۋىق كوپقاباتتى تۇرعىن ءۇي، وتىزدان استام اۆتوكولىك، وقۋ ورىندارى مەن قوعامدىق تاماقتانۋ ورىندارىنىڭ بۇلىنگەنىن جەتكىزگەن ەدى. ال ۋكراينا پرەزيدەنتى ۆلاديمير زەلەنسكي «رەسەي اتىستى توقتاتقىسى كەلمەيدى» دەگەن مالىمدەمە جاسادى.
«رەسەي كۇن سايىن سوققى بەرىپ جاتىر. ونىڭ سالدارىنان كۇن سايىن ادام ءولىمى تىركەلۋدە. رەسەي اتىستى توقتاتقىسى كەلمەيدى، ءبىز ونى كورىپ وتىرمىز. بۇكىل الەم مۇنى باقىلاپ وتىر. ءار زىمىران، ءاربىر شابۋىلداۋشى پيلوتسىز ۇشاق بۇل ەلدىڭ تەك سوعىستى قالايتىنىن دالەلدەيدى»،—دەدى مەملەكەت باسشىسى.
6 ءساۋىر كۇنى ۋكراينادا شابۋىل قۇرباندارىن ەسكە الۋ ءۇشىن ازا تۇتۋ كۇنى جاريالاندى.
ايتا كەتەيىك، كريۆوي روگ - ۋكراينانىڭ ءىرى ونەركاسىپ ورتالىعى. بۇل قالادا بىرنەشە تاۋ-كەن ءوندىرۋ، وڭدەۋ جانە مەتاللۋرگيا كاسىپورىندارى ورنالاسقان.
