4 sáýirde Reseı áskeri Krıvoı Rog ortalyǵyndaǵy turǵyn úılerge ballıstıkalyq raketalarmen soqqy jasaǵan bolatyn. Qazirgi tańda qaza tapqandar sany 20-ǵa jetti. Bul týraly Dnepropetrovsk oblystyq ákimshiliginiń basshysy Sergeı Lysak aıtty, dep habarlaıdy «Adyrna» tilshisi.
«Jaraqat alǵan taǵy bir adam aýrýhanada kóz jumdy. 57 jastaǵy er adamnyń ómiri úshin dárigerler barynsha kúresti. Ókinishke qaraı, ony qutqarý múmkin bolmady»,—dep jazdy Lysak áleýmettik jelidegi paraqshasynda.
Aıtýynsha, 75 adam jaralanǵan. Olardyń arasynda balalar da bar. Zardap shekkenderdiń eń kishisi — úsh aılyq sábı.
Buǵan deıin Lysak qalada jıyrmaǵa jýyq kópqabatty turǵyn úı, otyzdan astam avtokólik, oqý oryndary men qoǵamdyq tamaqtaný oryndarynyń búlingenin jetkizgen edi. Al Ýkraına prezıdenti Vladımır Zelenskıı «Reseı atysty toqtatqysy kelmeıdi» degen málimdeme jasady.
«Reseı kún saıyn soqqy berip jatyr. Onyń saldarynan kún saıyn adam ólimi tirkelýde. Reseı atysty toqtatqysy kelmeıdi, biz ony kórip otyrmyz. Búkil álem muny baqylap otyr. Ár zymyran, árbir shabýyldaýshy pılotsyz ushaq bul eldiń tek soǵysty qalaıtynyn dáleldeıdi»,—dedi memleket basshysy.
6 sáýir kúni Ýkraınada shabýyl qurbandaryn eske alý úshin aza tutý kúni jarııalandy.
Aıta keteıik, Krıvoı Rog - Ýkraınanyń iri ónerkásip ortalyǵy. Bul qalada birneshe taý-ken óndirý, óńdeý jáne metallýrgııa kásiporyndary ornalasqan.
