قاراعاندىدا ەكى جاسار بالانى اۋلادا كولىك قاعىپ كەتتى

قاراعاندىداعى تۇرعىن ءۇي كەشەندەرىنىڭ ءبىرىنىڭ اۋلاسىندا ەكى جاسار بالانى ساموكاتپەن جۇرگەن كەزدە كولىك قاعىپ كەتتى، دەپ حابارلايدى "ادىرنا" ۇلتتىق پورتالى.  وبلىستىق پوليتسيا دەپارتامەنتىنىڭ ءباسپاسوز قىزمەتىنىڭ مالىمەتىنشە، وقيعا 5 ءساۋىر كۇنى كەشكى ساعات 21:00 شاماسىندا بولعان. «36 جاستاعى Chevrolet Nexia كولىگىنىڭ جۇرگىزۋشىسى جاياۋ جۇرگىنشىلەر وتكەلىنەن ساموكاتپەن ءوتىپ بارا جاتقان 2 جاسار بالانى قاعىپ كەتكەن. جول-كولىك وقيعاسى سالدارىنان بالا مەديتسينالىق مەكەمەگە جەتكىزىلدى»، – دەپ حابارلادى پوليتسيا. قاجەتتى ساراپتامالار تاعايىندالدى، ولاردىڭ ناتيجەسى بويىنشا پروتسەسسۋالدىق شەشىم قابىلداناتىن بولادى. قۇقىق قورعاۋ ورگاندارى جۇرگىزۋشىلەرگە تۇرعىن ۇيلەر ورنالاسقان اۋماقتاردا جول قوزعالىسى ەرەجەلەرىن قاتاڭ ساقتاۋدى ەسكەرتتى. ال اتا-انالارعا – ءتىپتى كولىك قوزعالىسى شەكتەۋلى اۋلالاردا دا بالالاردى قاراۋسىز قالدىرماۋعا كەڭەس بەرىلدى.