4 ءساۋىر كۇنى اقش ۇلتتىق قاۋىپسىزدىك اگەنتتىگىنىڭ (NSA) باسشىسى گەنەرال تيموتي حو مەن ونىڭ ورىنباسارى ۆەندي نوبل قىزمەتتەرىنەن بوساتىلدى، دەپ حابارلايدى "ادىرنا" ۇلتتىق پورتالى The Washington Post باسىلىمىنا سىلتەپ.
تيموتي حو بۇل قىزمەتكە 2024 جىلدىڭ اقپان ايىندا تاعايىندالعان بولاتىن. ول تەك ءبىر جىلدان استام ۋاقىت قانا جۇمىس ىستەپ ۇلگەردى. سونىمەن قاتار، ول اقش-تىڭ كيبەرقاۋىپسىزدىك جانە كيبەرشابۋىلدارعا قارسى ءىس-قيمىل جۇرگىزەتىن US Cyber Command دەپ اتالاتىن پەنتاگون بولىمشەسىن دە باسقارعان. قازىرگى ۋاقىتتا حونىڭ قىزمەتتەن كەتۋىنىڭ ناقتى سەبەبى رەسمي تۇردە جاريالانعان جوق.
ونىڭ ورىنباسارى ۆەندي نوبل دا قىزمەتىنەن بوساتىلىپ، پەنتاگونداعى باسقا لاۋازىمعا اۋىستىرىلدى.
باق حابارلاۋىنشا، ۇلتتىق قاۋىپسىزدىك اگەنتتىگىن ۋاقىتشا باسقارۋ مىندەتى كيبەر باسقارماسىنىڭ ورىنباسارى ۋيليام دج. حارتمانعا، ال ورىنباسارلىق مىندەت شەيلا توماسقا جۇكتەلدى.
دەموكراتيالىق پارتيا وكىلى، كونگرەسس مۇشەسى دجيم حايمس بۇل شەشىمگە نارازىلىق ءبىلدىرىپ، گەنەرال حونى «زاڭدى ساقتايتىن جانە ۇلتتىق قاۋىپسىزدىكتى ءبىرىنشى ورىنعا قوياتىن ادال ءارى اشىق باسشى» دەپ سيپاتتادى. ونىڭ پىكىرىنشە، ءدال وسى قاسيەتتەر ترامپ اكىمشىلىگىندە قىزمەتتەن بوساتۋعا سەبەپ بولۋى مۇمكىن.
ايتا كەتەيىك، دونالد ترامپ بيىلعى قاڭتار ايىندا اقش پرەزيدەنتى قىزمەتىنە قايتا كىرىسكەننەن بەرى قارۋلى كۇشتەر مەن مەملەكەتتىك قۇرىلىمداردا بىرقاتار تۇبەگەيلى وزگەرىستەر جاساپ كەلەدى. اقپان ايىندا ول اقش قارۋلى كۇشتەرىنىڭ شتاب باستىقتارى كوميتەتىنىڭ توراعاسى گەنەرال چارلز "CQ" براۋندى دا مەرزىمىنەن بۇرىن قىزمەتتەن بوساتقان بولاتىن.
شەتەلدىك باق-تا اراپشىلار ترامپ اكىمشىلىگىنىڭ بۇل ارەكەتتەرىن فەدەرالدىق جۇيەنى قايتا قۇرۋعا باعىتتالعان ساياسي ستراتەگيا دەپ باعالاپ وتىر.
