بەلگىلى جۋرناليست، قالامگەر سەرىك ابىكەنۇلى قازاق اسكەرىندە بولىپ جاتقان وقيعالارعا قاتىستى پىكىر ءبىلدىردى. ءوزىنىڭ اسكەري بورىشىن وتەگەن شاقتارىن ەسكە الىپ، قازىرگى وتان قورعاۋشىلاردىڭ ءبىر-بىرىنە كورسەتكەن زۇلىمدىعىن اشىپ جازدى. ونىڭ ايتۋىنشا، قازىرگى اسكەردەگى ازاماتتار ءبىر-بىرىنە ەتەنە جاقىن باۋىر بولعاننىڭ ورنىنا، ءالجۋازىنا تەپەرىش كورسەتۋگە دايار. ولار ءزابىر كورسەتەر ادامىنىڭ باسىن جاستىقپەن قىمتاپ، ورىندىقتىڭ جالپاعىمەن ۇراتىن بولعان. بۇل جايلى "ادىرنا" ۇلتتىق پورتالى جازدى.
اسكەردەگى بولىپ جاتقان سوراقى جاعدايلارعا قاتىستى قالامگەر پىكىر ءبىلدىردى. الدىمەن اۆتور ساپتا قاتار تۇرىپ، وتان الدىنداعى مىندەتىن ادال اتقارعان زامانداستارىن ەسكە الادى:
- اسكەر دەگەن… ءبىز 90-جىلداردا قىزمەت ەتتىك. ەلگە كەلسەك جۇمىس جوق، ايلىق جوق، ازىق-تۇلىك جوق… جوق…جوق… سودان جانباعىس قامىمەن “بالاپان باسىنا، تۇرىمتاي تۇسىنا” بولىپ، قولدان كەلگەن شارۋامەن اينالىسىپ كەتتىك. ءبىرى ساۋدا جاسادى، ءبىرى مال باقتى. ءسويتىپ قىزمەتتەستەر شاشىراپ كەتىپ، ءبىر-بىرىمىزدەن كوز جازىپ ەدىك. سول جىگىتتەردىڭ ءبىرى 30(!) جىلدان كەيىن حابارلاسىپ: جولداس، سەرجانت سارىباەۆ! ۇمىتقان جوقسىڭ با، مەن قاتارداعى جاۋىنگەر پالەنشەەۆپىن؟! دەپ قارقىلداپ كۇلەدى. بەس-التى ازامات تابىسقان ەكەن، سودان مەنى ىزدەگەن. دوس-جاران ىزدەۋ جالعاسىپ 20-25 جىگىتتى انىقتاپ، باس قوستىق. ءومىرى كەلتە بولعان ازاماتتاردى ەسكە الدىق. ۋاتساپتا توپ اشىپ، اسكەردەگى قىزىقتاردى ايتىپ، ۋ-شۋمىز. جاس كۇندەگى سىيلاستىق، قۇرمەتتىڭ تاعدىر جولىنىڭ ءبىر قالتارىسىندا قالىپ قويماعانىنا ءدان رازىمىز.
جازباسىنىڭ شارىقتاۋ شەگىنە كەلگەن كەزدە سەرىك ابىكەنۇلى قازىرگى اسكەر قالپىنان شوشىنىپ، ونداعى "قورلىق پەن زورلىقتىڭ" ءتۇر-ءتۇرىن جىكتەيدى.
- ال بۇگىنگى وقيعالاردى ەستىگەندە توبە شاشىڭ تىك تۇرادى. ءبىر ورىندىققا جاستىق قويىپ، ءالجۋازدىڭ باسىن سوعان سالدىرىپ، ۇستىنە ەكىنشى جاستىق قويىپ، ورىندىقتىڭ جالپاعىمەن دۇڭكىلدەتىپ ۇراتىن، ءىز قالدىرمايتىن ايۋاندىق قايدان شىعىپ جاتىر؟ ولاي تاياق جەگەن جىگىتتىڭ تامىرلارى جارىلىپ ميىنا قان ۇيىپ قالادى، نە جىندى بولادى. ال بۇگىن جۇرت جارىسا جازىپ جاتقان جاي ءتىپتى سۇمدىق، قازاق ارمياسىنىڭ ابدەن ازعانىن كورسەتەدى، - دەدى جۋرناليست.
قالامگەردىڭ جازباسىنا قاتىستى پىكىر بىلدىرگەندەردىڭ قاراسى قالىڭ.
"بولىپ جاتقان جاعدايلار اسكەردەگى عانا ەمەس، جالپى جاستاردىڭ تاربيەسىن كورسەتىپ وتىر";
"ارميانى ينتەللەكتىدەن جۇرداي، وپىرەم كونتاركتنيك-سەرجانتتار قۇرتتى-اۋ...";
"ۇرىپ-سوققاندى ەلەستەتۋدىڭ ءوزى قانداي قورقىنىشتى. مۇنداي سۇمدىقتاردى ەستىگەن سايىن ءتۇن ۇيقىم ءتورت بولىنەدى عوي. ءار انانىڭ جۇرەگى اي-كۇننىڭ امانىندا وسىلاي پارشا-پارشا بوپ جۇرسە، ەلدىگىمىزدەن، تىنىشتىعىمىزدان نە قايىر؟! مەن بالامدى اسكەرگە قايتسەم جىبەرمەۋدىڭ امالىن ويلاپ تاڭ اتىرىپ، كەش باتىرىپ جۇرگەن جاننىڭ ءبىرىمىن!";
ء"بىزدىڭ قوعامداعى تاربيەنىڭ، ادامدار اراسىنداعى قارىم-قاتىناستىڭ ءسال وقشاۋ ورتادا بوي كورسەتۋى" دەپ جازدى وقىرماندار.
"ادىرنا" ۇلتتىق پورتالى
