4 sáýir kúni AQSh Ulttyq qaýipsizdik agenttiginiń (NSA) basshysy general Tımotı Ho men onyń orynbasary Vendı Nobl qyzmetterinen bosatyldy, dep habarlaıdy "Adyrna" ulttyq portaly The Washington Post basylymyna siltep.
Tımotı Ho bul qyzmetke 2024 jyldyń aqpan aıynda taǵaıyndalǵan bolatyn. Ol tek bir jyldan astam ýaqyt qana jumys istep úlgerdi. Sonymen qatar, ol AQSh-tyń kıberqaýipsizdik jáne kıbershabýyldarǵa qarsy is-qımyl júrgizetin US Cyber Command dep atalatyn Pentagon bólimshesin de basqarǵan. Qazirgi ýaqytta Honyń qyzmetten ketýiniń naqty sebebi resmı túrde jarııalanǵan joq.
Onyń orynbasary Vendı Nobl da qyzmetinen bosatylyp, Pentagondaǵy basqa laýazymǵa aýystyryldy.
BAQ habarlaýynsha, Ulttyq qaýipsizdik agenttigin ýaqytsha basqarý mindeti Kıber basqarmasynyń orynbasary Ýılıam Dj. Hartmanǵa, al orynbasarlyq mindet Sheıla Tomasqa júkteldi.
Demokratııalyq partııa ókili, Kongress múshesi Djım Haıms bul sheshimge narazylyq bildirip, general Hony «zańdy saqtaıtyn jáne ulttyq qaýipsizdikti birinshi orynǵa qoıatyn adal ári ashyq basshy» dep sıpattady. Onyń pikirinshe, dál osy qasıetter Tramp ákimshiliginde qyzmetten bosatýǵa sebep bolýy múmkin.
Aıta keteıik, Donald Tramp bıylǵy qańtar aıynda AQSh prezıdenti qyzmetine qaıta kiriskennen beri qarýly kúshter men memlekettik qurylymdarda birqatar túbegeıli ózgerister jasap keledi. Aqpan aıynda ol AQSh Qarýly kúshteriniń shtab bastyqtary komıtetiniń tóraǵasy general Charlz "CQ" Braýndy da merziminen buryn qyzmetten bosatqan bolatyn.
Sheteldik BAQ-ta arapshylar Tramp ákimshiliginiń bul áreketterin federaldyq júıeni qaıta qurýǵa baǵyttalǵan saıası strategııa dep baǵalap otyr.
