عارىشتا ءتورت كۇن وتكىزگەن حالىقارالىق Fram2 زەرتتەۋ ميسسياسىنىڭ مۇشەلەرى وتىرعان Crew Dragon كاپسۋلاسى 4 ءساۋىر كۇنى كاليفورنيا جاعالاۋىنا ءساتتى قوندى، دەپ حابارلايدى “ادىرنا” ۇلتتىق پورتالى.
بۇل كوممەرتسيالىق ميسسيانى SpaceX كومپانياسى جۇزەگە اسىردى.
كاپسۋلا قونۋ ساتىنەن كەيىن قۇتقارۋشىلار ونى تەڭىزدەگى ارنايى كەمەگە كوتەرىپ، اشتى. عارىشكەرلەر – ەريك فيليپس (اۋستراليا), رابەا روگگە (گەرمانيا), ياننيكە ميككەلسەن (نورۆەگيا) جانە چۋن ۆان (قىتاي-مالتا) – پالۋباعا ءوز بەتتەرىمەن شىقتى.
Fram2 – جەكە قارجىلاندىرىلعان حالىقارالىق عىلىمي ميسسيا. جوبا اتاۋىن 19-عاسىرداعى اتاقتى نورۆەگيالىق «فرام» زەرتتەۋ كەمەسىنىڭ قۇرمەتىنە الدى. ميسسيانى كريپتوۆاليۋتا سالاسىندا تابىسقا جەتكەن ميللياردەر چۋن ۆان ۇيىمداستىرىپ، ءوزى ەكيپاج جەتەكشىسى بولدى.
عارىشكەرلەر ساپار بارىسىندا 20-دان استام عىلىمي تاجىريبە جاسادى. ولاردىڭ قاتارىندا العاش رەت عارىشتا ادام اعزاسىنا رەنتگەن جاساۋ، ساڭىراۋقۇلاق ءوسىرۋ، اركتيكا مەن انتاركتيكا ۇستىنەن ۇشۋ سياقتى ەرەكشە زەرتتەۋلەر بولدى. سونىمەن قاتار، نورۆەگيالىق رەجيسسەر ياننيكە ميككەلسەن الەۋمەتتىك جەلىدە سالماقسىزدىقتا شاشىن قالاي كەپتىرەتىنىن كورسەتكەن بەينەجازبامەن ءبولىستى.
بۇل ساپاردا گەرمانيادان العاش رەت عارىشقا ۇشقان ايەل ادام بار.
29 جاستاعى رابەا روگگە – ەلەكتروينجەنەر ءارى اركتيكاعا ارنالعان روبوت تەحنيكاسىنىڭ مامانى. ول – عارىشقا ۇشقان العاشقى نەمىس ايەلى اتاندى. بۇعان دەيىن گەرمانيادان تەك 12 ەر ادام عانا عارىشتا بولعان. سوڭعى رەت 1978 جىلى زيگمۋند يەن ەسىمدى نەمىس ازاماتى كەڭەستىك «سويۋز» كەمەسىمەن عارىشقا ۇشقان بولاتىن.
