«سۇڭقار» («سويۋز-5») زىمىران-تاسىعىشىنىڭ العاشقى سىناقتىق ۇشىرىلىمى تاعى دا كەيڭنگە قالدى. ەندى 26 ساۋىرگە دەيىنگى ۋاقىتتا جۇزەگە اسىرۋ جوسپارلانىپ وتىر، دەپ حابارلايدى “ادىرنا” ۇلتتىق پورتالى قازتاگ-قا سىلتەپ.
«بۇعان دەيىن 13–16 ساۋىرگە جوسپارلانعان ۇشىرىلىمنىڭ رەزەرۆتىك كۇندەرىن 26 ساۋىرگە دەيىن شەگەرۋ ستارتتىق كەشەننىڭ جابدىقتارى مەن زىمىران-تاسىعىش جۇيەلەرىن قوسىمشا تەكسەرۋ قاجەتتىلىگىنە بايلانىستى. قاجەتتى تەكسەرۋلەر جۇرگىزىلىپ، ەسكەرتۋلەر جويىلعاننان كەيىن، ۇشىرىلىم كۇنى تۋرالى شەشىمدى مەملەكەتارالىق كوميسسيا قابىلدايدى»، — دەپ حابارلادى عارىش ايلاعىنداعى دەرەككوز.
ەسكە سالا كەتەيىك، باستاپقىدا «سۇڭقار» زىمىرانىن 27 ناۋرىزدا ۇشىرۋ جوسپارلانعان بولاتىن. الايدا تەحنيكالىق سەبەپتەرگە بايلانىستى ۇشىرۋ كۇنى رەزەرۆتىك كۇندەرگە اۋىستىرىلدى.
31 ناۋرىزدا پايدالى جۇكتەمەنىڭ ماكەتىمەن بىرگە «سۇڭقار» زىمىرانى №42 الاڭداعى قۇراستىرۋ-سىناق كورپۋسىنان تەمىرجول ارقىلى شىعارىلىپ، №45 الاڭداعى ۇشىرۋ قوندىرعىسىنا جەتكىزىلىپ، تىك كۇيدە ورناتىلدى.
«بايتەرەك» عارىشتىق زىمىران كەشەنى — قازاقستان مەن رەسەيدىڭ بىرلەسكەن جوباسى. ول «بايقوڭىر» كەشەنىندە ەكولوگيالىق تازا وتىن كومپونەنتتەرىن پايدالاناتىن زىمىراندارمەن عارىشقا ۇشىرۋ جۇمىستارىن جۇرگىزۋگە ارنالعان جەرۇستى ينفراقۇرىلىمدى قۇرۋدى كوزدەيدى. جوبا 2004 جىلى قۇرىلعان، ال 2005 جىلى سول كەزدەگى قازاقستان پرەزيدەنتى نۇرسۇلتان نازارباەۆ پەن رەسەي پرەزيدەنتى ۆلاديمير ءپۋتيننىڭ بايقوڭىرعا ساپارى كەزىندە رەسمي تۇردە ىسكە قوسىلعان.
باستاپقىدا «انگارا» زىمىران-تاسىعىشىن پايدالانۋ جوسپارلانعان، ال وعان ارنالعان ۇشىرۋ كەشەنىن №200 الاڭداعى بۇرىنعى «پروتون» زىمىرانىنىڭ №40 ۇشىرۋ قوندىرعىسىنىڭ ورنىندا سالۋ كوزدەلگەن ەدى.
كەيىن رەسەي جوسپارىن وزگەرتىپ، قۇرىلىس ءۇشىن №250 الاڭداعى بۇرىن «ەنەرگيا» زىمىرانىن سىناۋعا ارنالعان امبەباپ ستەند-ستارت ورنىن ۇسىندى. الايدا بۇل جوبا دا جۇزەگە اسپادى.
كەيىنىرەك «زەنيت» زىمىراندارىن ۇشىرۋ باعدارلاماسى اياقتالعان سوڭ، №42 الاڭداعى قۇراستىرۋ-سىناق كورپۋسى مەن №45 الاڭداعى ۇشىرۋ كەشەنىن قامتيتىن بارلىق جەرۇستى ينفراقۇرىلىم «بايقوڭىر» كەشەنىن رەسەي فەدەراتسياسىنىڭ جالعا الۋ كەلىسىمىنەن شىعارىلىپ، قازاقستان تاراپىنا — «بايتەرەك» بىرلەسكەن كاسىپورنىنا بەرىلدى.
«انگارا» زىمىرانىنىڭ ورنىنا، وعان ارنالعان ۇشىرۋ كەشەنىنىڭ قۇرىلىسى باستالماعاندىقتان، جاڭا «سۇڭقار» زىمىران-تاسىعىشى بەكىتىلدى. بۇل زىمىران ءۇشىن «زەنيت» كەشەنىنەن قالعان ينفراقۇرىلىمدى بەلگىلى ءبىر جاڭعىرتۋلار ارقىلى پايدالانۋعا مۇمكىندىك بولدى.
«سۇڭقار» زىمىران-تاسىعىشى — ورتا كلاستى ەكى ساتىلى زىمىران. ول رەسەيدەگى «ركتس پروگرەسس» اكتسيونەرلىك قوعامىندا وندىرىلەدى.
تەحنيكالىق سيپاتتامالارى: زىمىراننىڭ بيىكتىگى — باس قاپتاماسىنا بايلانىستى 58,8 م نەمەسە 65,2 م; ديامەترى — 4,1 م; ۇشىرۋ ماسساسى — 526–531 توننا; تومەنگى جەر وربيتاسىنا شىعاراتىن پايدالى جۇك ماسساسى — 17,4 توننا; گەوستاتسيونارلىق وربيتاعا — 2,5 توننا.
قولدانىلاتىن وتىن مەن توتىقتىرعىش — ەكولوگيالىق قاۋىپسىز نافتيل (كەروسين ءتۇرى) جانە سۇيىق وتتەگى.
بۇعان دەيىن رەسەيلىك باق-تىڭ زىمىران اتاۋىنا قاتىستى پىكىر جاريالاعان ەدىك. ال بىلتىر بايقوڭىرداعى گاگارين ستارت الاڭىنىڭ ورنىنان كونە وركەنيەت وشاعى تابىلعانى حابارلانعان بولاتىن.
