Ǵaryshta tórt kún ótkizgen halyqaralyq Fram2 zertteý mıssııasynyń músheleri otyrǵan Crew Dragon kapsýlasy 4 sáýir kúni Kalıfornııa jaǵalaýyna sátti qondy, dep habarlaıdy “Adyrna” ulttyq portaly.
Bul kommerııalyq mıssııany SpaceX kompanııasy júzege asyrdy.
Kapsýla qoný sátinen keıin qutqarýshylar ony teńizdegi arnaıy kemege kóterip, ashty. Ǵaryshkerler – Erık Fılıps (Aýstralııa), Rabea Rogge (Germanııa), Iannıke Mıkkelsen (Norvegııa) jáne Chýn Van (Qytaı-Malta) – palýbaǵa óz betterimen shyqty.
Fram2 – jeke qarjylandyrylǵan halyqaralyq ǵylymı mıssııa. Joba ataýyn 19-ǵasyrdaǵy ataqty norvegııalyq «Fram» zertteý kemesiniń qurmetine aldy. Mıssııany krıptovalıýta salasynda tabysqa jetken mıllıarder Chýn Van uıymdastyryp, ózi ekıpaj jetekshisi boldy.
Ǵaryshkerler sapar barysynda 20-dan astam ǵylymı tájirıbe jasady. Olardyń qatarynda alǵash ret ǵaryshta adam aǵzasyna rentgen jasaý, sańyraýqulaq ósirý, Arktıka men Antarktıka ústinen ushý sııaqty erekshe zertteýler boldy. Sonymen qatar, norvegııalyq rejısser Iannıke Mıkkelsen áleýmettik jelide salmaqsyzdyqta shashyn qalaı keptiretinin kórsetken beınejazbamen bólisti.
Bul saparda Germanııadan alǵash ret ǵaryshqa ushqan áıel adam bar.
29 jastaǵy Rabea Rogge – elektroınjener ári Arktıkaǵa arnalǵan robot tehnıkasynyń mamany. Ol – ǵaryshqa ushqan alǵashqy nemis áıeli atandy. Buǵan deıin Germanııadan tek 12 er adam ǵana ǵaryshta bolǵan. Sońǵy ret 1978 jyly Zıgmýnd Ien esimdi nemis azamaty keńestik «Soıýz» kemesimen ǵaryshqa ushqan bolatyn.
