سولتۇستىك قازاقستان وبلىسىنىڭ 84 جاستاعى تۇرعىنى ايدا لۋكيانوۆا قازاقستان پرەزيدەنتى قاسىم-جومارت توقاەۆقا بەينەۇندەۋ جاساپ، رەسەيلىك تەكتى بيزنەسمەن، Freedom Holding كومپانياسىنىڭ يەسى تيمۋر تۋرلوۆتىڭ ەلىمىزدەگى قىزمەتىنە توسقاۋىل قويۋدى سۇرادى، دەپ حابارلايدى “ادىرنا” ۇلتتىق پورتالى قازتاگ-قا سىلتەپ.
«قۇرمەتتى قاسىم-جومارت كەمەلۇلى! ءبىز – قازاقستان ازاماتتارى، سونىڭ ىشىندە كوپشىلىگىمىز زەينەتكەرلەر، سىزدەن مىرزا تۋرلوۆ مىرزانىڭ ەلىمىزدەگى كومپانيالارىنىڭ زاڭسىز ارەكەتتەرىنە نازار اۋدارىپ، ونىڭ جولىن كەسۋدى سۇرايمىز. ءبىز جيناعان بارلىق قاراجاتىمىزدان ايىرىلدىق. تۋرلوۆ مىرزا قازاقستان ازاماتتىعىن العانىمەن، ەلگە العىس ءبىلدىرۋدىڭ ورنىنا قاراپايىم حالىقتىڭ سەنىمىن پايدالانىپ، ءبىزدىڭ اقشامىزدى وفشورلارعا شىعارىپ جىبەردى»، – دەدى لۋكيانوۆا ءوز ۇندەۋىندە.
ونىڭ ايتۋىنشا، ءومىر بويى جيناعان قاراجاتىن قازاقستاندىق بانكتەردە ساقتاعان. الايدا Freedom Finance كومپانياسىنىڭ بروكەرلەرى وعان جانە باسقا دا زەينەتكەرلەرگە كەڭسەگە كەلىپ، ينۆەستيتسيالىق تابىس الۋ ءۇشىن قاراجاتتى سالىپ، كەلىسىمشارتتار جاساۋعا ۇگىتتەگەن.
كەيىن بەلگىلى بولعانداي، ازاماتتار كومپانيامەن ەمەس، بەليزدە تىركەلگەن جانە قازاقستاندا تىركەلمەگەن. الايدا تۋرلوۆتىڭ جەكە كومپانياسى – Freedom Broker Service-پەن كەلىسىمشارت جاساعان. وسى ارقىلى كوپتەگەن زەينەتكەرلەر جيناعان اقشالارىنان ايىرىلىپ قالدى.
«84 جاستامىن. ەندى كۇن كورۋ ءۇشىن قايتا جۇمىس ىستەۋگە ءماجبۇرمىن. كوپقاباتتى ءۇيدىڭ كىرەبەرىستەرىن جۋىپ، ەدەن جۋشى بولىپ ىستەيمىن. مەن – ۇلى وتان سوعىسىندا كۋرسك تۇبىندە قازا تاپقان وفيتسەردىڭ قىزىمىن. 80 جىلدىق جەڭىس مەرەيتويىنا قاتىسۋدى ارمانداعان ەدىم. بىراق سىزدەردىڭ كەسىرلەرىڭىزدەن بۇل ارمانىم ورىندالماي قالدى»، – دەدى ول كوزىنە جاس الىپ.
لۋكيانوۆا پرەزيدەنت پەن باس پروكۋراتۋرادان بارلىق زارداپ شەككەن ازاماتتاردىڭ قاراجاتىن قايتارۋعا كومەكتەسۋدى جانە تيمۋر تۋرلوۆتىڭ كومپانيالارىنىڭ قىزمەتىنە زاڭدى تۇردە توسقاۋىل قويۋدى سۇرادى.
ايتا كەتەيىك، بۇعان دەيىن Freedom Holding Corp.-قا قاراستى «فريدوم فينانس» كومپانياسىنداعى توپ-مەنەدجەرلەردىڭ اتىنا بىرنەشە الاياقتىق ءىس قوزعالعان بولاتىن
