استانادا 76 جاستاعى زەينەتكەر "سۋپەر اجە-2023" بايقاۋىنىڭ جەڭىمپازى اتاندى. ەلوردا اكىمدىگى رەسمي بايقاۋعا بارلىعى 63 پەن 76 جاس ارالىعىنداعى 10 ايەل قاتىسقانىن جەتكىزدى، دەپ حابارلايدى “ادىرنا” ۇلتتىق پورتالى.
بايقاۋعا قاتىسۋشىلار اراسىندا جوعارى ساناتتى ۇستازدار مەن دارىگەرلەر، حالىق حورىنىڭ انشىلەرى جانە رەسپۋبليكالىق ەرىكتىلەر قوزعالىسىنا قاتىسۋشىلار بولعان.
اجەلەر بار ونەرلەرى مەن اسپازدىق قىرلارىن كورسەتىپ، ۇلتتىق بيلەر مەن ۆوكالدىق نومىرلەردى ورىندادى. بايقاۋ قورىتىندىسى بويىنشا كۇلپاش قالقابەكوۆا جەڭىسكە جەتىپ جەڭىمپاز ءتاجى مەن 100 مىڭ تەڭگەلىك سەرتيفيكاتقا يە بولدى.
"ۇيىمداستىرۋشىلار مەن قاتىسۋشىلارعا وسىنداي بايقاۋ ءۇشىن ۇلكەن راحمەت. ولارعا جەڭىمپازدى تاڭداۋ قيىن بولعانى ءسوسىز. ءبىز ءبارىمىز بەلسەندى، كوڭىلدى جاندارمىز. مەن انسامبلدە ءان ايتامىن، بي ۇيىرمەسىنە بارامىن. جارىسقا قاتىسۋعا قولداۋ كورسەتكەن، سەنىم ءبىلدىرىپ، كومەكتەسكەن وتباسىما العىس ايتامىن. بارلىق اتا-اجەنى ۇيدە وتىرماي، بەلسەندى بولۋعا شاقىرامىن", - دەدى كۇلپاش قالقابەكوۆا.
شارانى ۇيىمداستىرۋشى ۆالەنتينا تولماچەۆانىڭ ايتۋىنشا، مۇنداي بايقاۋلار تەك اجەلەرگە عانا ەمەس، جاستارعا دا قاجەت.
"ولارعا قاراپ، اجەلەردىڭ دە بەلسەندىلىك تانىتا الاتىنىن تۇسىنۋگە بولادى. بۇگىنگى قاتىسۋشىلار باسقا زەينەتكەرلەرگە ۇلگى", - دەدى ۇيىمداستىرۋشى.
ايتا كەتەيىك، "سۋپەر اجە-2023" بايقاۋى استانادا العاش رەت ءوتتى.
