74 جاستاعى قازاقستاندىق ايەل ورىنبور اۋەجايىندا پوليتسەيلەرگە شابۋىل جاساعانى ءۇشىن قاماۋعا الىندى. بۇل تۋرالى ورىنبور اۋداندىق سوتى ايتتى، دەپ حابارلايدى «ادىرنا» ءتىلشىسى.
سوت مالىمەتىنشە، زەينەتكەر رەسەيدە تۇراتىن قىزىنا بارۋ ءۇشىن جولعا شىققان. ول ەكى ەل اراسىنداعى مەملەكەتتىك شەكارانى اۆتوكولىكپەن كەسىپ ءوتىپ، ۇشاقپەن جولىن جالعاستىرماق بولعان. تەكسەرۋ كەزىندە ايەلدىڭ قول جۇگىنەن ماي قۇيىلعان 5 ليترلىك قۇتى تابىلعان.
«تاسىمالداۋ ەرەجەلەرى ەسكەرتىلگەن كەزدە ايەل اگرەسسيا تانىتىپ، ەكى قۇقىق قورعاۋ ورگانى قىزمەتكەرىن ۇرعان. بۇلتارتپاۋ شاراسىن تاڭداۋ ءۇشىن سوتقا جەتكىزىلگەن كەزدە ازاماتشا كىناسىن مويىنداماي، مۇنداي ارەكەت جاساماعانىن العا تارتقان»،-دەلىنگەن حابارلامادا.
جاسىن ەسكەرە وتىرىپ، سوت بۇعان دەيىن ءوتىنىشتى قاراۋدى كەيىنگە قالدىرىپ، كەپىل نەمەسە ۇيقاماق سياقتى بالاما شارالاردى ۇسىنعان. الايدا ايەلدىڭ تۇرعىلىقتى جەرىنەن دە، ۋاقىتشا ۇستاۋ يزولياتورىنان دا بەرىلگەن مىنەزدەمەلەر ونىڭ قوعامدا بەلگىلەنگەن نورمالار مەن مىنەز-قۇلىق ەرەجەلەرىنە باعىنۋعا نيەتى جوق ەكەنىن كورسەتكەنى حابارلاندى.
جەكە تۇلعاسىنا قاتىستى جينالعان دەرەكتەردى، سونداي-اق زەينەتكەردىڭ رەسەي اۋماعىنان شۇعىل كەتۋگە نيەتتى ەكەنى جونىندەگى جەدەل اقپاراتتى ەسكەرە وتىرىپ، سوت قازاقستان ازاماتىنا قاتىستى بۇلتارتپاۋ شاراسى رەتىندە 2 اي مەرزىمگە قاماۋعا الۋ تۋرالى شەشىم قابىلدادى.
