اباي وبلىسىنىڭ اكىمى بەرىك ءۋالي ەل تۇرعىندارىنا ۇندەۋ جاسادى، دەپ حابارلايدى “ادىرنا” ۇلتتىق پورتالى.
“بۇگىن سىزدەرگە ارنايى بەينەۇندەۋ جاساۋدى ءجون كوردىم.
اباي وبلىسى ۇلى تۇلعانىڭ اتىمەن اتالعان، الاش ارىستارىنىڭ ءىزى قالعان تاريحى تەرەڭ، تابيعاتى كوركەم ءوڭىر. بۇل – ءبىزدىڭ ورتاق ءۇيىمىز. ونى تازا، جايلى، كورىكتى ەتىپ ۇستاۋ – ارقايسىمىزدىڭ ازاماتتىق بورىشىمىز.
شىن مانىندە، ءبىزدىڭ ايماق توعىز جولدىڭ تورابىندا تۇر. ەرتىستىڭ ەكى جاعاسىن جالعاعان جالعىز كوپىردەن ەكى الىپ كورشىمىزگە قاراي كولىك اعىنى وتەدى. بۇل تۇرعىدان العاندا سەمەيىمىز ايماقتىق كولىك-لوگيستيكالىق حابقا اينالىپ كەلەدى. بۇل بىزگە ۇلكەن مۇمكىندىك بەرگەنىمەن، زور جاۋاپكەرشىلىك تە جۇكتەيدى. شاھارىمىزدىڭ تازالىعى مەن ايماعىمىزدىڭ ابىرويى سىنالاتىن دا وسى تۇس.
ايماق ەكونوميكاسى، ونەرى مەن مادەنيەتى، ەكولوگياسى مەن تازالىعى – بارشامىزعا ورتاق. ال تازالىق دەگەنىمىز – جىلىنا ءبىر رەت سەنبىلىككە قاتىسۋ ەمەس، بۇل – ءبىزدىڭ وڭىردە قالىپتاسۋى ءتيىس ۇلكەن مادەنيەت.
مەملەكەت باسشىسى قاسىم-جومارت كەمەلۇلى توقاەۆ بۇل جونىندە «قالالار مەن اۋىلداردىڭ ساۋلەتتى، ساياباقتار مەن اۋلانىڭ تازا بولۋى، ەڭ الدىمەن، باسقاعا ەمەس، وزىمىزگە كەرەك»، – دەپ اتاپ وتكەن بولاتىن.
تۋعان جەرىمىزدىڭ تۇلەگەنى، تۇرعان ورتامىزدىڭ كىرشىكسىز بولعانى، ەڭ الدىمەن، وزىمىزگە كەرەك. وبلىسىمىزدىڭ تازالىعى – اكىمدىك پەن كوممۋنالدىق قىزمەتتىڭ عانا ەمەس، ءاربىر ازاماتتىڭ، ءاربىر وتباسىنىڭ جاۋاپكەرشىلىگى. ءبىر-بىرىمىزگە جاناشىرلىقپەن، قورشاعان ورتاعا قامقورلىقپەن قاراماساق، كۇندەلىكتى جۇرەتىن كوشەلەرىمىزدى، بالالارىمىز وينايتىن اۋلالارىمىزدى سىرتتان كەلىپ ەشكىم تازالاپ بەرمەيدى.
وسى ماقساتتا پرەزيدەنتىمىزدىڭ باستاماسىمەن قولعا الىنعان «تازا قازاقستان» باعدارلاماسى اياسىندا ءبىز وبلىسىمىزدا جالپىوڭىرلىك سەنبىلىكتى باستاعالى تۇرمىز. بىراق بۇل ءبىر رەتتىك اكتسيا ەمەس، جىل بويى جالعاساتىن جاقسى داستۇرگە اينالۋى ءتيىس.
باستامانىڭ باياندى بولۋىنا سەپتىگى تيەر دەگەن نيەتپەن، ءبىز ارنايى بايقاۋ جاريالاپ، «ۇزدىك اۋدان»، «ۇزدىك اۋىل»، «ۇزدىك اۋلا»، «ۇزدىك ۋنيۆەرسيتەت»، «ۇزدىك كوللەدج»، «ۇزدىك مەكتەپ»، «ۇزدىك بالاباقشا»، «ۇزدىك كوشە»، «ۇزدىك مەكەمە» نوميناتسيالارى بويىنشا شىنايى جاناشىر جانداردى انىقتايمىز. ارينە، جەڭىمپازدارعا قوماقتى سىيلىقتار دا تاعايىندالادى.
قادىرلى اباي وبلىسىنىڭ تۇرعىندارى!
تۋعان جەرىمىزدىڭ تازالىعى ءۇشىن جۇمىلۋ ارقايسىمىزدىڭ پەرزەنتتىك پارىزىمىز!
مەن وسى رەتتە بيزنەس وكىلدەرىن، ىرگەلى وقۋ ورىندارىن، پاتريوت جاستار مەن ەرىكتىلەردى، بىرلىگى جاراسقان كاسىپورىندار مەن ۇيىمداردى وسى يگى ىسكە بەلسەندى اتسالىسۋعا شاقىرامىن.
بيىل ايماعىمىز اتىن يەلەنگەن ۇلى ابايدىڭ 180 جىلدىعى! پرەزيدەنتىمىز ايتقانداي، بۇل مەرەيتويدى لايىقتى دەڭگەيدە اتاپ ءوتۋىمىز كەرەك. ءبىز ءبىر قولدىڭ سالاسىنداي، ءبىر ءۇيدىڭ بالاسىنداي بىرىگىپ، بۇل شارانى جاقسى اتقارۋعا ءتيىسپىز. بىرلىك تانىتاتىن تۇستىڭ ءبىرى – وسى ءسات، اعايىن. سەبەبى ءبىز ەلىمىزدىڭ تۇكپىر-تۇكپىرىنەن كەلەتىن قوناقتارعا كوركەم دە، تازا قالامىزدى ۇيالماي كورسەتە الۋىمىز كەرەك.
وبلىس ورتالىعى رەتىندە ەكىنشى تىنىسى ەندى اشىلا باستاعان قالامىز ەشبىر شاھاردان كەم ەمەس. ءبىز ەلىمىزدىڭ مەگاپوليستەرى استانا، الماتى، شىمكەنت سياقتى ءىرى قالالارىنان ۇلگى الۋىمىز كەرەك.
جالپى، تازالىق اكتسيالارىنا ەرەكشە ءمان بەرەتىن شەت مەملەكەتتەر دە از ەمەس. تەرريتورياسى ءبىزدىڭ وبلىستان بىرنەشە ەسە كىشى ەستونيادا باستالعان وسىنداي اكتسيا «الەمدىك تازالىق كۇنىنە» اينالدى. ال ءبارىمىز بىلەتىن، تازالىق مادەنيەتى قالىپتاسقان جاپونيادا «تازالىق كۇندەرى» ءىس-شاراسى ءجيى وتكىزىلەدى.
قوعامدىق ورىننىڭ تازالىعى — ءار ادامنىڭ مادەنيەتى مەن ۇلتقا دەگەن قۇرمەتىنىڭ ايناسى. تازالىقتى ساقتاۋ — تەك ءتارتىپ ەمەس، بۇل — ىشكى قۇندىلىعىمىز. دىنىمىزدە «تازالىق — يماننىڭ جارتىسى» دەلىنسە، دانا حالقىمىز «تازالىق – ساۋلىق نەگىزى، ساۋلىق – بايلىق نەگىزى» دەپ بەكەر ايتپاعان. بۇل — حالقىمىزدىڭ ومىرلىك فيلوسوفياسى مەن بۇگىنگى تالاپقا ساي ۇستانىمىنىڭ ۇندەسۋى.
وبلىس اكىمدىگى تازالىققا بايلانىستى مىندەتتەرىن ورىنداي بەرەدى. قوردالانعان ماسەلەلەر رەت-رەتىمەن، كەزەڭ-كەزەڭىمەن شەشىلەدى. بيىلدىڭ وزىندە وبلىستا 400 شاقىرىم جول جوندەلىپ، «اۋىل – ەل بەسىگى» باعدارلاماسى اياسىندا 223 شاقىرىم جول قايتا جاڭعىرتىلادى. 77 مىڭ ءتۇپ اعاش ەگىلەدى.
سونداي-اق، بيىل سەمەي قالاسىندا 22 اۋلانى اباتتاندىرۋ جوسپارلانىپ وتىر. ونىڭ 11-ءى سول جاعالاۋدا، 11-ءى وڭ جاعالاۋدا. 8 قوعامدىق ورىن جاڭارتىلادى.
بيىل وبلىس ورتالىعىندا 210 اۆتوبۋس ايالداماسى ورناتىلادى. 60 جاڭا اۆتوبۋس الامىز. قالا جولدارىن تازالاۋ ءۇشىن مەردىگەر كومپانيالار قازىردىڭ وزىندە ءتۇرلى تيپتەگى 10 ارنايى تەحنيكا ساتىپ الدى. الداعى ۋاقىتتا دا كوشە تازالايتىن تەحنيكالاردى الاتىن بولامىز.
بيىل سەمەيدەگى 10, اۋداندارداعى 100-گە جۋىق كوشەنى جارىقتاندىرامىز.
سونداي-اق، سەمەيدەگى جىلۋ جۇيەلەرىن جاڭعىرتۋ ماقساتىندا 6 جوبا ىسكە اسپاق. بۇل جىلۋ تاپشىلىعىن ايتارلىقتاي ازايتادى. دەمەك، مەكتەپ، بالاباقشا، تۇرعىن ۇيلەر، قوناقۇيلەر مەن ءىرى ساۋدا ورىندارىن سالۋعا مۇمكىندىك تۋادى.
قادىرلى جەرلەستەر!
اباي وبلىسىنىڭ ءاربىر تۇرعىنى تۋعان جەردىڭ تازالىعىنا، كوركەيۋىنە بىرگە ۇلەس قوسايىق. الىپتار تۇلەگەن كيەلى توپىراقتىڭ اجارىنا ءار بەرۋ – ارقايسىمىزدىڭ قاسيەتتى بورىشىمىز! بارشاڭىزدى جالپىوڭىرلىك سەنبىلىككە بەلسەندى قاتىسۋعا شاقىرامىن. باستامانى بارلىعىڭىز ءبىر ادامداي قولدايدى دەپ سەنەمىن. بيىل كۇزدە ءسىز بولىپ، ءبىز بولىپ تازالىق اكتسياسىنىڭ جەڭىمپازدارىن بىرگە انىقتايىق
ەندەشە، ىسكە ءسات دەيمىن. باستامامىز بەرەكەلى بولسىن!”، - دەلىنگەن ۇندەۋدە.
