بۇگىن اباي وبلىسىنىڭ اكىمى بەرىك ءۋالي نىسانداردى ارالاۋ بارىسىندا سەمەي قالاسىندا «ەسكى كوپىر» اتاۋىمەن بەلگىلى اۆتوگۋج كوپىرىندە جوندەۋ جۇمىستارىنىڭ باستالاتىنىن ايتتى.
ء"بىر اپتانىڭ ىشىندە اياقتاۋدى تاپسىرامىن. كىرەبەرىس جولدارىن قوسا العاندا 1 شاقىرىمعا جۋىق اۋماققا قالىڭدىعى 6 سم اسفالت توسەلەدى. وسىلايشا قالامىزداعى ەكى كوپىر دە تولىق جاڭارادى",دەدى وبلىس اكىمى.
بۇعان دەيىن سەمەيدەگى اسپالى كوپىر مەن اينالما جولدىڭ اسفالت جابىندىسى تولىق اۋىستىرىلعان بولاتىن. جوندەۋ اياقتالعاندا قالاداعى قوزعالىس قاۋىپسىزدىگى مەن قولايلىلىعى ايتارلىقتاي ارتادى.
سونىمەن قاتار، بەرىك ءۋالي ەسكى كوپىردىڭ جانىندا سالىنىپ جاتقان جاڭا كولىك وتكەلىنىڭ قۇرىلىس جۇمىستارىن تەكسەردى.
مەملەكەت باسشىسىنىڭ تاپسىرماسىمەن ۇزىندىعى 810 مەتر، ەنى 21,5 مەتر بولاتىن نىساننىڭ قۇرىلىسى 2022 جىلى باستالعان. 2022–2024 جىلدارى جوبانى جۇزەگە اسىرۋعا 16,7 ملرد تەڭگە ءبولىنىپ، بيىل رەسپۋبليكالىق بيۋدجەتتەن 10,3 ملرد تەڭگە قاراستىرىلدى. ونىڭ 5,5 ملرد تەڭگەسى يگەرىلدى. جوبا بويىنشا 9 تىرەك ورناتۋ جوسپارلانسا، بۇگىنگى تاڭدا ونىڭ التاۋى دايىن. 9 مىڭ توننا مەتالل كونسترۋكتسيانىڭ 2,5 مىڭ تونناسى قۇراستىرىلدى.
قۇرىلىستى اياقتاۋعا قوسىمشا 19 ملرد تەڭگە قاجەت. «ورتالىق ازيا – قىتاي» سامميتىنەن كەيىن قحر تاراپىنان ايماق ەلدەرىنە قايتارىمسىز گرانت ءبولۋ ماسەلەسى كوتەرىلگەن. اتالعان كوپىردى گرانت ەسەبىنەن قارجىلاندىرۋ تۋرالى وبلىستىڭ ۇسىنىسى پرەزيدەنتتىڭ قولداۋىنا يە بولىپ، ۇكىمەتكە ءتيىستى تاپسىرما بەرىلدى.
قازىرگى ۋاقىتتا نىساندا 15 تەحنيكا جانە 120 جۇمىسشى ەكى اۋىسىمدا ەڭبەك ەتۋدە. قۇرىلىستى 2026 جىلعى تامىزدا اياقتاۋ جوسپارلانعان. وبلىس اكىمى مەردىگەر كومپانياعا بيىل جىل سوڭىنا دەيىن كوپىردىڭ ءبىرىنشى كەزەڭىن اياقتاپ، كولىك قوزعالىسىن قامتاماسىز ەتۋدى، ال اسفالت جابىندىسىن كەلەسى كوكتەمدە توسەۋدى تاپسىردى.
