Abai oblysynyŋ äkımı Berık Uäli el tūrǧyndaryna ündeu jasady, dep habarlaidy “Adyrna” ūlttyq portaly.
“Bügın sızderge arnaiy beineündeu jasaudy jön kördım.
Abai oblysy ūly tūlǧanyŋ atymen atalǧan, alaş arystarynyŋ ızı qalǧan tarihy tereŋ, tabiǧaty körkem öŋır. Būl – bızdıŋ ortaq üiımız. Ony taza, jaily, körıktı etıp ūstau – ärqaisymyzdyŋ azamattyq boryşymyz.
Şyn mänınde, bızdıŋ aimaq toǧyz joldyŋ torabynda tūr. Ertıstıŋ ekı jaǧasyn jalǧaǧan jalǧyz köpırden ekı alyp körşımızge qarai kölık aǧyny ötedı. Būl tūrǧydan alǧanda Semeiımız aimaqtyq kölık-logistikalyq habqa ainalyp keledı. Būl bızge ülken mümkındık bergenımen, zor jauapkerşılık te jükteidı. Şaharymyzdyŋ tazalyǧy men aimaǧymyzdyŋ abyroiy synalatyn da osy tūs.
Aimaq ekonomikasy, önerı men mädenietı, ekologiiasy men tazalyǧy – barşamyzǧa ortaq. Al tazalyq degenımız – jylyna bır ret senbılıkke qatysu emes, būl – bızdıŋ öŋırde qalyptasuy tiıs ülken mädeniet.
Memleket basşysy Qasym-Jomart Kemelūly Toqaev būl jönınde «Qalalar men auyldardyŋ säulettı, saiabaqtar men aulanyŋ taza boluy, eŋ aldymen, basqaǧa emes, özımızge kerek», – dep atap ötken bolatyn.
Tuǧan jerımızdıŋ tülegenı, tūrǧan ortamyzdyŋ kırşıksız bolǧany, eŋ aldymen, özımızge kerek. Oblysymyzdyŋ tazalyǧy – äkımdık pen kommunaldyq qyzmettıŋ ǧana emes, ärbır azamattyŋ, ärbır otbasynyŋ jauapkerşılıgı. Bır-bırımızge janaşyrlyqpen, qorşaǧan ortaǧa qamqorlyqpen qaramasaq, kündelıktı jüretın köşelerımızdı, balalarymyz oinaityn aulalarymyzdy syrttan kelıp eşkım tazalap bermeidı.
Osy maqsatta Prezidentımızdıŋ bastamasymen qolǧa alynǧan «Taza Qazaqstan» baǧdarlamasy aiasynda bız oblysymyzda jalpyöŋırlık senbılıktı bastaǧaly tūrmyz. Bıraq būl bır rettık aksiia emes, jyl boiy jalǧasatyn jaqsy dästürge ainaluy tiıs.
Bastamanyŋ baiandy boluyna septıgı tier degen nietpen, bız arnaiy baiqau jariialap, «üzdık audan», «üzdık auyl», «üzdık aula», «üzdık universitet», «üzdık kolledj», «üzdık mektep», «üzdık balabaqşa», «üzdık köşe», «üzdık mekeme» nominasiialary boiynşa şynaiy janaşyr jandardy anyqtaimyz. Ärine, jeŋımpazdarǧa qomaqty syilyqtar da taǧaiyndalady.
Qadırlı Abai oblysynyŋ tūrǧyndary!
Tuǧan jerımızdıŋ tazalyǧy üşın jūmylu ärqaisymyzdyŋ perzenttık paryzymyz!
Men osy rette biznes ökılderın, ırgelı oqu oryndaryn, patriot jastar men erıktılerdı, bırlıgı jarasqan käsıporyndar men ūiymdardy osy igı ıske belsendı atsalysuǧa şaqyramyn.
Biyl aimaǧymyz atyn ielengen ūly Abaidyŋ 180 jyldyǧy! Prezidentımız aitqandai, būl mereitoidy laiyqty deŋgeide atap ötuımız kerek. Bız bır qoldyŋ salasyndai, bır üidıŋ balasyndai bırıgıp, būl şarany jaqsy atqaruǧa tiıspız. Bırlık tanytatyn tūstyŋ bırı – osy sät, aǧaiyn. Sebebı bız elımızdıŋ tükpır-tükpırınen keletın qonaqtarǧa körkem de, taza qalamyzdy ūialmai körsete aluymyz kerek.
Oblys ortalyǧy retınde ekınşı tynysy endı aşyla bastaǧan qalamyz eşbır şahardan kem emes. Bız elımızdıŋ megapolisterı Astana, Almaty, Şymkent siiaqty ırı qalalarynan ülgı aluymyz kerek.
Jalpy, tazalyq aksiialaryna erekşe män beretın şet memleketter de az emes. Territoriiasy bızdıŋ oblystan bırneşe ese kışı Estoniiada bastalǧan osyndai aksiia «Älemdık tazalyq künıne» ainaldy. Al bärımız bıletın, tazalyq mädenietı qalyptasqan Japoniiada «Tazalyq künderı» ıs-şarasy jiı ötkızıledı.
Qoǧamdyq orynnyŋ tazalyǧy — är adamnyŋ mädenietı men ūltqa degen qūrmetınıŋ ainasy. Tazalyqty saqtau — tek tärtıp emes, būl — ışkı qūndylyǧymyz. Dınımızde «Tazalyq — imannyŋ jartysy» delınse, dana halqymyz «Tazalyq – saulyq negızı, saulyq – bailyq negızı» dep beker aitpaǧan. Būl — halqymyzdyŋ ömırlık filosofiiasy men bügıngı talapqa sai ūstanymynyŋ ündesuı.
Oblys äkımdıgı tazalyqqa bailanysty mındetterın oryndai beredı. Qordalanǧan mäseleler ret-retımen, kezeŋ-kezeŋımen şeşıledı. Biyldyŋ özınde oblysta 400 şaqyrym jol jöndelıp, «Auyl – El besıgı» baǧdarlamasy aiasynda 223 şaqyrym jol qaita jaŋǧyrtylady. 77 myŋ tüp aǧaş egıledı.
Sondai-aq, biyl Semei qalasynda 22 aulany abattandyru josparlanyp otyr. Onyŋ 11-ı sol jaǧalauda, 11-ı oŋ jaǧalauda. 8 qoǧamdyq oryn jaŋartylady.
Biyl oblys ortalyǧynda 210 avtobus aialdamasy ornatylady. 60 jaŋa avtobus alamyz. Qala joldaryn tazalau üşın merdıger kompaniialar qazırdıŋ özınde türlı tiptegı 10 arnaiy tehnika satyp aldy. Aldaǧy uaqytta da köşe tazalaityn tehnikalardy alatyn bolamyz.
Biyl Semeidegı 10, audandardaǧy 100-ge juyq köşenı jaryqtandyramyz.
Sondai-aq, Semeidegı jylu jüielerın jaŋǧyrtu maqsatynda 6 joba ıske aspaq. Būl jylu tapşylyǧyn aitarlyqtai azaitady. Demek, mektep, balabaqşa, tūrǧyn üiler, qonaqüiler men ırı sauda oryndaryn saluǧa mümkındık tuady.
Qadırlı jerlester!
Abai oblysynyŋ ärbır tūrǧyny tuǧan jerdıŋ tazalyǧyna, körkeiuıne bırge üles qosaiyq. Alyptar tülegen kielı topyraqtyŋ ajaryna är beru – ärqaisymyzdyŋ qasiettı boryşymyz! Barşaŋyzdy jalpyöŋırlık senbılıkke belsendı qatysuǧa şaqyramyn. Bastamany barlyǧyŋyz bır adamdai qoldaidy dep senemın. Biyl küzde sız bolyp, bız bolyp tazalyq aksiiasynyŋ jeŋımpazdaryn bırge anyqtaiyq
Endeşe, ıske sät deimın. Bastamamyz berekelı bolsyn!”, - delıngen ündeude.
Ūqsas jaŋalyqtar
