قازاقستاننىڭ بىرىككەن اراب امىرلىكتەرىندەگى ەلشىلىگىنىڭ بۇرىنعى كەڭەسشىسى ساكەن ماماش استانادا ۇستالدى. بۇل اقپاراتتى استانانىڭ پوليتسيا دەپارتامەنتى راستادى، دەپ حابارلايدى “ادىرنا” ۇلتتىق پورتالى.
“وتكەن جىلى ەلشى كەڭەسشىسىنىڭ بۇرىنعى كومەكشىسىنە قاتىستى جۇبايىن جۇيەلى تۇردە سوققىعا جىققانى بويىنشا قىلمىستىق ءىس قوزعالدى. پوليتسيا تاراپىنان جەدەل-تەرگەۋ توبى قۇرىلىپ، وقيعانىڭ بارلىق ءمان-جايىن انىقتاۋ ءۇشىن قاجەتتى ساراپتامالار كەشەنى جۇرگىزىلدى. ايتارلىقتاي دالەلدەمەلەر جينالىپ، بەكىتىلدى. تەرگەۋ ناتيجەسىندە كۇدىكتى ساكەن ماماشقا قاتىستى تەرگەۋ سوتى ونى قاماۋدا ۇستاۋ تۇرىندەگى بۇلتارتپاۋ شاراسىن تاڭدادى. تەرگەۋ مۇددەسى ءۇشىن الدىن الا تەرگەۋدىڭ باسقا دەرەكتەرى جاريا ەتىلمەيدى”، دەيدى پد وكىلى ۇلىسمەدياعا.
ەسكە سالساق، 2024 جىلدىڭ مامىر ايىندا كارينا ماماش «نە مولچي» قوعامدىق قورىنىڭ الەۋمەتتىك پاراقشاسىندا ۇندەۋ جاريالاپ، سىرتقى ىستەر مينيسترلىگىندە ديپلومات بولىپ قىزمەت ەتەتىن كۇيەۋىنەن زورلىق-زومبىلىق كورگەنىن ايتتى.
بۇل جاعدايدان كەيىن ءسىم ديپلوماتتىڭ دەرەۋ ەلگە قايتارىلىپ، تەرگەلەتىنىن مالىمدەدى. ال 10 مامىردا ەلگە قايتارىلعان شەنەۋنىكتىڭ ۇستىنەن قىلمىستىق ءىس قوزعالعانى حابارلاندى.
