وڭتۇستىك كورەيا ەلىنە جۇمىس ىستەۋگە بارعان وتانداسىمىز قاماۋعا الىندى. بۇل تۋرالى @korea_komek Instagram پاراقشاسى جاريالادى، دەپ حابارلايدى “ادىرنا” ۇلتتىق پورتالى.
اقپاراتقا سۇيەنسەك، قازاقستان ازاماتى ازىق-تۇلىك دۇكەنىندەگى ساتۋشى قىزعا قىرىنداپ، قولىنان سۇيگەن.
«وقيعا ورنىنا پوليتسيا كەلگەن كەزدە قازاقستاندىق جىگىت قاشىپ كەتكەن. جەدەل ىزدەستىرۋ بارىسىندا پوليتسيا قىزمەتكەرلەرى وتانداسىمىزدى ۇستادى. كارىس قىزىنا قىرىنداعان جىگىت ۋاقىتشا ۇستاۋ يزولياتورىنا قاماۋعا الىندى. سوتقا دەيىنگى تەرگەۋ جۇمىستارى باستالدى»، دەلىنگەن مالىمەتتە.
ەگەر قازاقستان ازاماتىنىڭ كىناسى دالەلدەنسە، ول 1 جىلعا دەيىن باس بوستاندىعىنان ايىرىلۋ جازاسىن ارقالاۋى مۇمكىن ەكەن.
وڭتۇستىك كورەياداعى قازاقستاندىق بلوگەر سامات احمەتوۆكە شەت ەلگە ناپاقا تابۋعا بارعان وتانداسىمىز ونداعى زاڭنىڭ وسىنشاما قاتال ەكەنىن بىلمەگەنىن، باسقالار قاتەلىگىن قايتالاماۋىن ايتىپ بەرگەن.
«مەن ۇلكەن قاتەلىك جاسادىم. قىزدان كەشىرىم دە سۇرادىم. كورەيانىڭ زاڭى وسىنشاما قاتال ەكەنىن، ءبىر عانا قولىنان سۇيگەنىم ءۇشىن قاماۋعا الىناتىنىمدى بىلگەن جوقپىن. باسقا جىگىتتەرگە ايتارسىز، ولار مەن جاساعان قاتەلىكتى قايتالاماسا ەكەن»، - دەيدى قاماۋعا الىنعان قازاقستاندىق.
