قازاق ەلى قالىپتاستىرعان ۇلتتىق بىرلىكتىڭ ونەگەلى ۇلگىسى جىل جىلجىپ، ۋاقىت سىنى نىسانالاسا دا قۇنىن قۇلدىراتقان جوق.
بابانىڭ اماناتىنداي ارقالاعان بىرلىكتىڭ ءتۇپ-تامىرى تاۋەلسىزدىك تۇسىندا اسسامبلەيا بولىپ ءبۇر اتىپ، قوعامدىق كەلىسىم بولىپ گۇلدەدى. ازات بولعان شيرەك عاسىردا قازاقستان تاعدىرلى، تالايلى شەشىمدەر شىعارىپ ىرگەنى ىلكىمدى ىستەرمەن بەكىتتى.
بىرلىكتى بەكەمدەپ، تاۋەلسىزدىكتى نىعايتۋعا باعىتتالعان وڭ قادامداردىڭ ۇلى باستاماسى 1995 جىلى نەگىزى قالانعان - قازاقستان حالقى اسسامبلەياسى. وتكەنگە تاريحي شەگىنىس جاساساققازاقتىڭ دارحان دالاسى ساياسي قىسىم كورىپ جەر اۋعان سان حالىقتى باۋىرىنا باسىپ، جەرگىلىكتى ايماققا بەيىمدەلۋى ءۇشىن بارىن سالدى. وسى ونەگە ەگەمەن بولعان كەزەڭدە كەمەلدەنە تۇسكەنى الەمگە ايان.
اسسامبلەيانىڭ ارقالاعان جۇگى مەن مەجەلەگەن ميسسياسى تۋرالى ەلباسى نۇرسۇلتان ءابىشۇلى نازارباەۆ وردالى ورگاننىڭ ءى سەسسياسىندا بىلايشا تولعادى:
«...اسسامبلەيا قازىر قازاقستاندا تۇراتىن بارلىق حالىقتارعا ءبىزدىڭ بىرلىگىمىزدىڭ ءتۇپ-تامىرىن جاقسىراق تۇسىنۋىنە كومەكتەسىپ، كەز كەلگەن تاريحي كىنا ارتۋلارعا جول بەرمەۋگە ءتيىس. ويتكەنى وتكەنگە كوز سالا وتىرىپ بولاشاقتى كورە بىلگەن ءجون».
تۇڭعىش پرەزيدەنتتىڭ ناق وسى سوزدەرىاسسامبلەيا مەن قوعامدىق كەلىسىم مەكەمەلەرىنىڭ نەگىزگى فۋنكتسياسىن اڭعارتتى. ەتنوسارالىق ىنتىماقتاستىقتىڭ الاۋى سونبەۋىنە يەك ارتقان ەلباسى جىل سايىنعى جولداۋلارىندا دا بىرلىكتىڭ تۇراقتى فورمۋلاسىن ۇسىنىپ كەلەدى.
«تاتۋلىق + تۇسىنىستىك = تۇعىرلى تاۋەلسىزدىك» ورنەگىن قۇرايتىن جالپىۇلتتىق ىنتىماقتاستىقتىڭ ءرولىن ەلباسى ۇندەۋ، ارنايى ماقالالارى ارقىلى دا ۇزدىكسىز شەگەندەپ كەلەدى.
بەيبىتشىلىكتىڭ قازاقستاندىق مودەلى قالىپتاسۋىنداعى سىندارلى ساياسات ينكليۋزيۆتى بەينەگە بالانىپ، تىرشىلىكتىڭ سان سالاسىن قامتىپ قارىشتاۋىنىڭ ارعى جاعىندا نۇرسۇلتان نازارباەۆتىڭ ساياسي كورەگەندىگى مەن قىرانعا ءتان ەرىك-جىگەرى كورىنىس تابادى.
قازاقستاندى150-دەن اسا ۇلىس وكىلدەرى ورتاق وتان ەتكەن. ايتۋعا وڭاي بولعانمەن 150 –دەن اسا ەتنوس – 150 تاريح، 150 مادەنيەت، 150 ءتىل ەكەنى ايدان انىق. وسىنشا ەرەكشەلىكتەرگە قاراماي بارلىق ەتنوستىڭ ءبىر تۋ استىندا بىرىگىپ، اققاۋ شورتان ءھام شايان حالىنە تۇسپەۋى قازاقستاندىق ساياساتتىڭ ۇلتارالىق كەلىسىمگە قول جەتكىزگەندىگىنىڭ جارقىن نىشانى.
كەلىسىم كەزەڭىندە قابىلدانعان كونستيتۋتسيا دا قازاقستاندىقتاردىڭ ءتۇرلى ەرەكشەلىكتەرىنە قاراماي، ساياسي، الەۋمەتتىك، ەكونوميكالىق، ازاماتتىق ستاتاتۋستارى مەن قۇقىعىنىڭ تەڭ ەكەنىن ىلعي العا تارتىپ كەلەدى.
مەملەكەتتى قۇراۋشى باسىم حالىقپەن ءبىر دەڭگەيدە بارلىق ەتنوس وكىلدەرى ورتاق تاريحي وتاننىڭ دامۋى جولىندا كۇش بىرىكتىرىپ، قىزمەت ەتۋ باعىتىندا ەكەنىنە كوز كۋا.
ءىنجۋ ومىرزاق،
”ادىرنا” ۇلتتىق پورتالى
